Эрон президенти ядро битими бўйича музокараларга тайёрлигини билдирди

Эрон президенти Иброҳим Раисий 2015 йилда тузилган ядро битимини янгилаш борасида жаҳоннинг етакчи давлатлари билан музокара ўтказиш учун ўз шартларини маълум қилди, деб ёзади Reuters.

Агентликнинг таъкидлашича, Франция ва Германия Эронни июнь ойида мамлакатда бўлиб ўтган президентлик сайловларидан сўнг музокараларга қайтишга ундаган. Шу билан бирга, Теҳроннинг ядровий фаолияти кенгайиб бораётгани юзасидан Ғарбнинг хавотир билдириши фонида Париж зудлик билан битимни қайта тиклашни талаб қилган.

Ўтган ой Франция, Германия ва Буюк Британия Бирлашган Миллатлар Ташкилоти таркибидаги Ядровий хавфсизлик бошқармасининг (МАГАТЭ) Эрон тўғрисидаги ҳисоботларидан хавотир билдирган. Ҳисоботда айтилишича, Эрон биринчи бўлиб парчаланадиган тоза уран металлини 20 фоизгача бойитилган ҳолда ишлаб чиқарди, шунингдек уранни 60 фоизга бойитиш билан ишлаб чиқариш қувватини оширди.

Ўз навбатида, Эрон мамлакатнинг ядровий дастури тинч хусусиятга эга эканини айтди ва кузатувчи органга ўз фаолияти тўғрисида хабар берди. Шунингдек, таъкидланишича, агар АҚШ ўз санкцияларидан воз кечса, Эроннинг 2015 йилги ядро келишувидан чиқиши ҳам бекор қилинади.

«Ғарб сиёсатчилари ва америкаликлар музокараларни босим билан олиб бормоқда. Мен эса ҳукуматимиз босим билан эмас, кун тартиби бўйича музокара олиб боришини эълон қилганман. Бу музокараларда биз адолатсиз санкцияларнинг бекор қилинишига эришишга интилмоқдамиз», — деди Раисий давлат телевидениеси эфирида.

Эроннинг янги президенти Иброҳим Раисий 5 август куни расман лавозимига киришганди. Ўша куни президент ўз зиммасига юкланган барча мажбуриятларни бажариш учун бор имкониятларини ишга солишга қасамёд қилди.