Сўнгги йилларда мамлакатимизда тўқимачилик ва тикув-трикотаж саноатини ривожлантириш, соҳа корхоналарининг инвестиция ва экспорт фаолиятини қўллаб-қувватлаш бўйича комплекс чора-тадбирлар амалга оширилиши натижасида республикада ишлаб чиқарилаётган маҳсулотлар сифати, ҳажми ва турлари ортиб, мамлакатимизнинг экспорт салоҳияти ўсиб бораётганини кўриш мумкин.
Ўзбекистон Республикаси Президентининг 2023 йил 10 январдаги “Пахта-тўқимачилик кластерлари фаолиятини қўллаб-қувватлаш, тўқимачилик ва тикув-трикотаж саноатини тубдан ислоҳ қилиш ҳамда соҳанинг экспорт салоҳиятини янада ошириш чора-тадбирлари тўғрисида”ги Фармони, Ўзбекистон Республикаси Президентининг 2020 йил 21-октябрдаги “Экспорт фаолиятини молиявий қўллаб-қувватлашни янада кенгайтириш чора-тадбирлари тўғрисида”ги Фармони ҳамда Ўзбекистон Республикаси Президентининг 2024 йил 14 мартдаги “Ташқи савдо ва ҳудудий саноатни ривожлантиришда тадбиркорлар бирлашмаларининг ролини янада ошириш чора-тадбирлари тўғрисида”ги Қарорига асосан, Экспортни рағбатлантириш агентлиги ҳамда Экспортни қўллаб-қувватлаш жамғармаси негизида Давлат активларини бошқариш агентлиги муассислигида “Савдони ривожлантириш компанияси” АЖнинг экспортолди молиялаштириш маблағлари ҳисобидан “Микрокредитбанк” АТБ томонидан ажратилган имтиёзли кредит орқали экспорт режасини ортиғи билан бажараётган корхоналар талайгина.
Улардан бири Бухоро вилояти Ромитан туманидаги “Ромстар” Ўзбекистон–Америка қўшма корхонасидир. Пиллани қайта ишлаш корхонаси 2004 йилда иш бошлаган бўлиб, бу ерда вилоятдаги Қоракўл, Олот, Жондор, Ромитан туманларидан 18 минг касаначилар етиштирган пилла қабул қилиниб, ипак калавага айлантирилади.
Республикамизда пиллачилик соҳасини ривожлантириш, ишлаб чиқариладиган маҳсулот турларини кенгайтириш, пиллачилик корхоналарининг экспорт салоҳиятини ва инвеститиция фаолиятини ҳар томонлама қўллаб-қувватлаш бўйича олиб борилаётган комплекс чора-тадбирлар натижасида ушбу корхонанинг ҳам экспорт салоҳияти йилдан йилга ортиб бормоқда. 220 нафар ишчи-мутахассисга эга “Ромстар” қўшма корхонасида саноат учун қимматбаҳо пилла хом ашёсини қайта ишаш, пилла чувиш, қайта ўраш, хом ипак тола ва ипак момиғини ишлаб чиқариш фаолияти йўлга қўйилган бўлиб, ушбу маҳсулотлар асосан Хитой, Ветнам ва Эрон давлатларига экспорт қилинмоқда.
Корхонанинг ишлаб чиқариш қувватига тўхталадиган бўлсак, Хитой технологияси асосида йил бўйи 150 тонна хом ипак тола ишлаб чиқариш имкониятига эга. Мавжуд шарт-шароитдан келиб чиққан ҳолда корхонада 2023 йилда 120,3 тонна ипак тола ишлаб чиқарилган бўлиб, буюртмачиларга етказилган ипак тола эвазига 4 миллиард сўмдан ортиқ соф фойда олинган. Ўзбек ипак маҳсулотлари экспортини амалга ошириш билан шуғулланиб келаётган қўшма корхонанинг йиллик ҳисоб рақам айланмаси 30 миллиардни ташкил этади.
Корхона раҳбари Қўшши Каттаевнинг таъкидлашича, у корхона фаолиятини кенгайтиришда “Микрокредитбанк”нинг молиявий кўмагига таянади. “Ромстар” корхонаси ҳозирга қадар 18 маротаба айнан мазкур банк кредит линияларидан фойдаланган. Корхонанинг маҳсулотлар экспортини қўллаб-қувватлаш мақсадида банк томонидан 1 000 000 АҚШ доллари микдорида 20 ой муддатга, 6 ойлик имтиёзли давр билан, 6 фоизли кредит мабағлари ажратилган.
“Хом ашё ва ишлаб чиқариш салмоғи ошаётгани туфайли мазкур корхона тизимидаги 6 та пилла қабул қилиш маскани модернизациялаш дастурига биноан қайта реконструкция қилингани ҳисобидан Ромитан, Жондор, Қоракўл ва Олот туманларидаги масканларда жами 117 та қўшимча иш ўрни яратилган. Мазкур қайта таъмирлаш ишлари учун 8,5 миллиард сўм маблағ сарфланган бўлиб, пилла етиштириш ва қабул масканларида саранжомлаш мавсумида 4 мингга яқин ёлланма ишчи жалб қилмоқдамиз”, - дейди корхона раҳбари.
Корхона ўз олдига аниқ мақсадлар қўйган. Йилига 80 тонна ипак толаси, 30 тонна ипак момиғи ишлаб чиқарилаётган ушбу корхонада эндиликда ипак матолари хусусан, атлас тўқиш ҳам йўлга қўйилиши режалаштирилган. Хорижий давлатларда ўтказиладиган “MILANO УНИCА” каби турли халқаро кўргазмаларда ҳам фаол иштирок этиб келаётган корхона Япония, Италия, Германия, Швейцария, Руминия ва Испаниянинг йирик компаниялари вакиллари билан ўзбек ипак маҳсулотлари экспортини амалга ошириш ҳамда ипакдан тайёр маҳсулотларни ишлаб чиқариш учун Ўзбекистонда ўзаро ҳамкорликда янги инвестиция лойиҳаларини йўлга қўйиш юзасидан музокаралар олиб бормоқда.
Маълумот ўрнида айтиш лозимки, жорий йил бошидан бери “Микрокредитбанк” АТБ томонидан тадбиркорлик субъектларининг инвестицион лойиҳаларини молиялаштириш учун республика бўйича “Ромстар” сингари яна 95 та лойиҳага жами 384,4 млрд. сўм эквивалентида маблағлар ажратилган. “Микрокредитбанк” ўзининг хорижий кредит линиялари орқали жалб қилинган маблағлари билан иқтисодиётнинг реал сектори корхоналарини модернизация қилиш ва инвестиция лойиҳаларини молиявий қўллаб-қувватлашда давом этади.
Реклама ҳуқуқи асосида
Изоҳ (0)