АҚШнинг собиқ президенти ва президентликка номзод Дональд Трамп Мета корпорацияси асосчиси Марк Цукербергни 2020 йилда унга қарши фитна уюштиришни режалаштирганликда айблади ва 2024 йилда ҳам бу такрорланса, қамоқ билан таҳдид қилди. Бу ҳақда Politico Трампнинг янги китобига таяниб хабар берди.
ОАВ хабарларига кўра, собиқ президентнинг “Американи қутқариш” номли янги китоби 3 сентябрь куни оммага тақдим этилади. Унда Трамп Цукербергни 2020 йилги президентлик сайловларида унга қарши фитна уюштирганликда айблаган.
Қайд этилишича, китобда Трамп ва Цукербергнинг Оқ уйга ташрифи чоғида ўтказилган учрашув акс этган фотосурат бор. Шунингдек, собиқ президент Цукербергни 2020 йилги сайловлар вақтида махсус қутилар ўрнатганликда ҳам айблаган, Трамп буни унга қарши фитнанинг бир қисми деб атаган.
ОАВ хабарларига кўра, бу билан Трамп Цукерберг ва унинг рафиқаси Прискилла Чаннинг 2020 йилги сайловлар давомида сайлов инфратузилмасини молиялаштириш учун қилган 420 миллион долларлик ҳиссасини назарда тутган.
Трамп, шунингдек, у ва унинг жамоаси 2024 йилги президентлик пойгаси вақтида Цукербергни диққат билан кузатишини айтиб, бизнесмен ноябрдаги президентлик сайловларида ноқонуний иш қилса, унга умрбод қамоқ жазоси билан таҳдид қилган.
АҚШда президентлик сайловлари жорий йилнинг 5 ноябрь куни бўлиб ўтади. Демократик партиядан вице-президент Камала Ҳаррис, Республикачилар партиясидан эса Дональд Трамп иштирок этмоқда.
Изоҳ (0)