AQSH prezidentligiga demokrat nomzod Kamala Harris intellektual qobiliyatni aniqlash testini topshirishga tayyorligini bildirdi va o‘zining respublikachi raqibi, AQSHning sobiq prezidenti Donald Trampni ham ushbu testni topshirishga chaqirdi.
Avvalroq Tramp Harrisning IQ darajasi juda past ekanini aytgan va uni aqliy testdan o‘tishga chaqirgan edi. Sobiq prezidentning ta’kidlashicha, uning raqibi intervyulardan birida eng oddiy savollarga to‘g‘ri javob bera olmagan.
“Albatta. Men ham uni xuddi shunday qilishga chaqirardim. Lekin gap shundaki, u haqiqatdan ham borgan sari beqaror bo‘lib bormoqda. Aslida uning Amerika xalqi uchun rejasi yo‘q”, dedi Harris CBS telekanaliga bergan intervyusida.
U Tramp ma’muriyatining bir qator sobiq yuqori martabali amaldorlari Trampning prezident bo‘lishga noloyiqligini aytganini ta’kidladi.
Harris avvalroq o‘z tibbiy hisobotini e’lon qilgan edi, uning shifokori siyosatchining “salomatligi a’lo darajada” ekanligini tasdiqlagan. Hisobotda aytilishicha, 60 yoshli Harris “juda sog‘lom ovqatlanish”ga rioya qiladi va faol hayot tarzini olib boradi. Uning aprel oyida o‘tkazilgan so‘nggi tibbiy ko‘rigida hech qanday buzilishlar aniqlanmagan.
Avgust oyida CBS News telekanaliga o‘zining tibbiy ma’lumotlarini “bajonidil” e’lon qilishini aytgan 78 yoshli Tramp o‘shandan beri bunday so‘rovlarni bir necha bor rad etgan.
“Trampning so‘nggi paytlarda omma oldida chiqishlari borgan sari cho‘zilib ketdi, bu esa kognitiv pasayish belgisi bo‘lishi mumkin”, deb yozadi New York Times nashri.
Izoh (0)