Демократик партиядан АҚШ президентлигига номзод Камала Ҳаррис унинг устувор вазифаларидан бири Эрон ҳеч қачон ядровий давлатга айланмаслигини таъминлаш эканини маълум қилди.
Журналист Ҳаррисдан АҚШнинг асосий рақиби ҳақида сўраганда, у Эронни аниқ вариант эканлигини айтди.
“Эроннинг қўлида Америка қони бор. Биз Эрон ҳеч қачон ядровий давлатга айланиш имкониятига эга бўлмаслигини таъминлашимиз керак – бу менинг энг муҳим вазифаларимдан бири”, деди АҚШ вице-президенти CBS News телеканалига берган интервьюсида.
Бироқ у Эрон ядровий қурол яратаётганига оид далилларни аниқласа, Қўшма Штатлар ҳарбий чора кўрадими, деган саволга жавоб бермаган.
Бир кун аввал Пентагон раҳбари Ллойд Остин Исроил Мудофаа вазирлиги раҳбари Йоав Галант билан телефон суҳбатида Эроннинг Яқин Шарқ минтақасидаги “беқарорлаштирувчи ҳаракатлари”ни муҳокама қилган эди. Остин Қўшма Штатлар Исроилнинг ўзини ҳимоя қилиш ҳуқуқини қўллаб-қувватлашда давом этишини яна бир бор таъкидлаган.
1 октябрь куни Эрон Исроилга 180 дан ортиқ ракета учиргани хабар қилинганди. Исроил армиясига кўра, снарядларнинг бир қисми тутиб олинган, бироқ баъзилари очиқ жойларга тушган. Камида бир киши ҳалок бўлгани ва икки нафар фуқаро жароҳат олгани айтилган. Ислом инқилоби қўриқчилари корпусига кўра, бу ҳужум Ливандаги “Ҳизбуллоҳ” гуруҳи етакчилари Ҳасан Насруллоҳ ва ҲАМАС етакчиси Исмоил Ҳаниянинг ўлдирилишига жавоб бўлган.
Изоҳ (0)