Тошкентнинг Чилонзор туманидан оқиб ўтувчи Бўрижар каналида уч киши чўкиб кетгани ҳақида хабар берилганди. Бош прокуратура матбуот хизмати раҳбари Ҳаёт Шамсутдинов улар чет эл фуқаролари эканини “Дарё”га маълум қилди.
Аниқланишича, вафот этган 35 ёшли аёл М.Ю.Суркан ва унинг 5 ёшли ўғли М.П.Суркан Россия фуқароси бўлиб, Тошкентда вақтинча яшаган. Болани қутқармоқчи бўлган эркак эса 43 ёшли Ву Дзюнань — Хитой фуқароси бўлган.
Бола 10 апрель куни Яккасарой тумани, Шаршара кўчаси бўйлаб оқиб ўтувчи Бўрижар канали олдида турганида эҳтиётсизлик оқибатида каналга тушиб кетган ва чўккан. Бунга гувоҳ бўлган хитойлик эркак, сўнг боланинг онаси уни қутқариш мақсадида каналга сакраган.
Бир оз вақтдан сўнг она-боланинг мурдалари Бўрижар каналининг Чилонзор тумани ҳудудидан оқиб ўтувчи қисмидан топилган. ФВВ Тошкент шаҳар бошқармаси томонидан олиб борилган қидирув ҳаракатлари натижасида шу куни хитойлик эркакнинг ҳам жасади топилган.
Маълум қилинишича, хитойлик эркак Яккасарой туманидаги меҳмонхонада вақтинча яшаб келган. У 2024 йил 26- март куни тадбиркорларга таржимонлик қилиш мақсадида Ўзбекистонга келган.
Айни пайтда ҳолат юзасидан Чилонзор туман прокуратураси томонидан терговга қадар текширув ҳаракатлари олиб борилмоқда.
Изоҳ (0)