Жорий йил бошида Тошкент вилоятида жами аҳолининг 10,2 фоизини камбағал оилалар ташкил этган. Бу ҳақда Ижтимоий ҳимоя миллий агентлиги ахборот хизмати хабар бермоқда.
Тошкент вилоятида “Камбағалликдан – фаровонлик сари” дастури доирасида бажарилган ишлар муҳокама қилинган. Унда айтилишича, вилоятда аҳолининг 10,2 фоизини камбағал оилалар ташкил этган бўлса, йил якунида 7 фоизга тушиши кутилмоқда.
Бугун ҳудудда 63 минг 9 та камбағаллик даражасидаги оилалар мавжуд. Эндиликда, вилоятда раҳбарлар ҳафтанинг жума кунида ўзига бириктирилган камбағал оилаларда бўлиб, улар билан суҳбатлашади, берилган имтиёз ва имкониятларни тушунтиради, — дейилади агентлик ахборотида.
Октябрь ойидан бошлаб камбағал оилалар реестри шакллантирилмоқда. Келаси йил 1 январдан камбағал оилалар фарзандлари давлат мактабгача таълим ташкилотларига имтиёзли асосда қабул қилинади.
Президент фармонига кўра, 2024 йилнинг қолган даврида 500 минг, 2025 йилда 1 миллион нафар аҳолини камбағалликдан чиқариш давлат ижтимоий-иқтисодий сиёсатининг ҳамда барча даражадаги давлат органлари ва ташкилотларининг биринчи даражали вазифаси этиб белгиланган.
БМТ Тараққиёт дастурининг Ўзбекистондаги доимий вакили бой ва камбағал қатлам ўртасидаги фарқни камайтириш учун коррупцияга йўл қўймаслик кераклигини айтган эди.
Изоҳ (1)
Men ham kam ta‘milangan oilalar ro‘yhatida turama. Ikki farzandim bor. Bir farzandimi nogiron. Hozirda Tosh vil Bo‘stonlik tuman Azadbosh qishlog‘ida ijarada turamiz. Besh yoshli o‘g‘limni shu yerdagi davlat bog‘chasiga joylashmoqchi bo‘lib borgandim birinchi oyiga besh yuz ming so‘m berasiz, ikki yuz ming shapkasi, yuz ming navbatsiz joylashgani uchun, ikki yuz ming oylik to‘lov, keyingi oydan navbati kelgunicha uch yuz mingdan berasiz dedi. Mana uch oydan beri navbat kutyapmiz men kasal qizim bn ovoraman o‘g‘lim qarovsiz qolyapti.