Шавкат Мирзиёев 25 сентябрь куни Самарқанд шаҳрида ўтаётган Осиё инфратузилмавий инвестициялар банки Бошқарувчилари кенгашининг тўққизинчи йиллик йиғилишида сўзлаган нутқида Ўзбекистонни аҳоли даромади ўртачадан юқори бўлган мамлакатлар қаторига киритиш учун катта марралар қўйилганини айтди.
“Ўтган даврда ялпи ички маҳсулотимиз ҳажми 2 баробар кўпайиб, илк бор 100 миллиард доллардан ошди. Келгуси беш йилда бу рақамни 160 миллиард долларга етказишни режа қилганмиз. Бундан кўзланган асосий мақсад — мамлакатимизни аҳолиси даромади ўртачадан юқори бўлган мамлакатлар қаторига олиб чиқишдир. Ушбу мақсадларга эришиш учун олдимизга катта-катта марраларни қўйганмиз”, деди президент.
Давлат раҳбари тўрт йил ичида Ўзбекистондаги камбағаллик даражасини 23 фоиздан 11 фоизга туширишга эришилгани таъкидлади. 2024 йилда бу кўрсаткични 9 фоизгача, 2030 йилга қадар эса 2 баробар пасайтириш мақсад қилинганини айтди.
“Бизнинг ислоҳотларимиз туб негизида тадбиркорликни фаол қўллаб-қувватлаш, одамларимиз учун барча соҳаларда янги иш ўринларини ва даромад манбаларини кўпайтиришдек устувор вазифа мужассам.
Шу билан бирга, аҳолининг сифатли таълим ва тиббий хизматлардан фойдаланиш имкониятларини кенгайтириш, уй-жой шароитларини яхшилаш, ижтимоий ҳимояни кучайтириш, энг оғир ҳудудларда инфратузилма тармоқларини барпо этишни қамраб олган “кўп ўлчовли” камбағалликни қисқартириш дастурини амалга оширяпмиз”, деди Шавкат Мирзиёев.
Президент шу боис илғор хорижий ёндашувлар асосида энг қуйи бўғин — маҳалла даражасига тушган ҳолда камбағалликни қисқартириш бўйича Ўзбекистон тажрибаси яратилганини айтиб ўтди.
“Яқинда иқтисодиёт бўйича Нобель мукофоти совриндори жаноб Абхижит Банержи “Ўзбекистондаги маҳалла тизими ҳар бир муҳтож оилани камбағалликдан олиб чиқиш бўйича ўзининг ноёб ресептига эга”, деб таъкидлагани ҳам бежиз эмас”, деди Шавкат Мирзиёев.
Изоҳ (0)