БМТ Бош Ассамблеясининг 79-сессиясида Ўзбекистон ТИВ раҳбари Бахтиёр Саидов нутқ сўзлади.
“Президенти Шавкат Мирзиёев жаноби олийларининг БМТ раҳбарияти, давлат раҳбарлари ва сессияда иштирок этаётган делегацияларга тинчлик ва фаровонлик эзгу тилакларини етказдик.
Биз дунёнинг кўп нуқталарида нотинчликлар кучайиб бораётганига гувоҳ бўлмоқдамиз. Иқлим ўзгариши, камбағаллик, технологик номутаносиблик каби долзарб муаммоларни ҳал қилишда барчани яқинроқ глобал ҳамкорликка чақирамиз”, деб ёзди вазир Telegram'даги саҳифасида.
Унинг билдиришича, сессияда Ўзбекистон номидан қуйидагилар таклиф қилинди:
- ривожланаётган давлатлар имкониятларини кенгайтириш мақсадида халқаро молия тизимини ислоҳ қилиш;
- барча учун хавфсиз, фойдаланиш мумкин бўлган рақамли технологиялар билан таъминлаш;
- иқлим ўзгаришига қарши кураш бўйича халқаро ҳамкорликни, айниқса Марказий Осиёнинг заиф минтақаларида кучайтириш;
- аёллар ва ёшлар имкониятларини кенгайтириш;
- терроризм ва коррупцияга қарши курашишда ҳаракатларни бирлаштириш;
- Марказий Осиё ва ундан ташқарида транспорт коридорлари ва иқтисодий алоқаларни кенгайтириш;
- Термиз шаҳридаги Афғонистон фуқаролари учун ўқув марказини Глобал ўқув марказига айлантириш.
Бахтиёр Саидов барқарор ривожланиш мақсадларига содиқлик ва Марказий Осиёда тинчлик ва барқарорликни таъминлашда фаол иштирок этиш Ўзбекистоннинг асосий устувор вазифалари бўлиб қолишини қайд этди.
2023 йилда БМТ Бош Ассамблеясининг 78-сессиясида Шавкат Мирзиёев иштирок этиб, нутқ сўзлаганди. Унда глобал ва минтақавий кун тартибидаги энг долзарб масалалар ечимига қаратилган қатор ташаббусларни илгари сурди.
Изоҳ (0)