Самарқанд шаҳрида бўлиб ўтган самарали музокаралар якунида Ўзбекистон президенти Шавкат Мирзиёев ва Иордания Ҳошимийлар подшоҳлиги подшоҳи Абдулла II ибн ал-Ҳусайн Шериклик муносабатларини мустаҳкамлаш тўғрисида қўшма баёнот қабул қилди.
Президент матбуот хизматининг хабар беришича, умуман, ташриф доирасида 15 та икки томонлама ҳужжат имзоланди, жумладан:
- Экстрадиция тўғрисида битим;
- Инвестицияларни ўзаро рағбатлантириш ва ҳимоя қилиш тўғрисида битим;
- Қўшма комиссия тузиш тўғрисида битим;
- Виза талабларини бекор қилиш тўғрисида битим;
- Олий таълим ва илмий тадқиқотлар соҳасида ҳамкорлик тўғрисида битим;
- Туризм соҳасида ҳамкорлик тўғрисида битим;
- Ҳаво қатнови тўғрисидаги ҳукуматлараро битимга ўзгартиришлар киритиш тўғрисида баённома;
- Товарлар ва транспорт воситалари ҳаракати тўғрисидаги дастлабки маълумотларни онлайн алмашиш тўғрисида баённома;
- Қишлоқ хўжалиги соҳасида ҳамкорлик тўғрисида битим;
- Ўсимликлар карантини ва ҳимояси соҳасида ҳамкорлик тўғрисида битим;
- Ветеринария соҳасида ҳамкорлик тўғрисида битим;
- Стандартлаштириш, метрология ва мувофиқликни баҳолаш соҳасида меморандум;
- дин ишлари бўйича англашув тўғрисида идоралараро меморандумлар;
- Иордания Ҳошимийлар подшоҳлиги подшоҳи Абдулла II ибн ал-Ҳусайннинг давлат ташрифи давомида эришилган келишувларни амалга ошириш бўйича амалий чора-тадбирлар режаси.
Ҳужжатлар имзоланишидан лавҳалар
Иордания подшоҳининг Ўзбекистонга ташрифи
Иордания подшоҳи Абдулла II ибн ал-Ҳусайн Ўзбекистон президенти таклифига биноан 25 август куни илк бор давлат ташрифи билан Ўзбекистонга келди. Уни Самарқанд шаҳри аэропортида Шавкат Мирзиёев кутиб олди. Шу куни улар биргаликда Самарқанд шаҳрининг тарихий обидалари, жумладан, Амир Темур мақбараси, Мирзо Улуғбек, Шердор ва Тиллакори мадрасаларидан иборат Регистон мажмуаси билан танишди. Самарқанд халқаро туризм марказидаги “Боқий шаҳар” тарихий-этнографик мажмуасини бориб кўрди.
26 август куни Самарқанд шаҳридаги Конгресс маркази биноси олдидаги майдонда Иордания подшоҳини тантанали кутиб олиш маросими ўтказилди. Маросимдан кейин Иордания подшоҳи Ўзбекистонда ишлаб чиқарилаётган экспортбоп маҳсулотлар кўргазмаси билан танишди. Шундан сўнг олий даражадаги музокаралар бўлиб ўтди. Мулоқотда сиёсий, савдо-иқтисодий ва инвестициявий ҳамкорликни ривожлантириш масалаларини кўриб чиқилди.
Изоҳ (0)