АҚШ президенти Жо Байден 9 октябрь куни Исроил бош вазири Биньямин Нетаньяху билан телефон орқали мулоқот қилишни режалаштирмоқда.
Axios нашрининг хабар беришича, улар Исроилнинг Эрон ҳужумига жавобини муҳокама қилади. Шунга ўхшаш маълумот Reuters томонидан тақдим этилган.
Байден ва Нетаньяху ўртасидаги кутилаётган суҳбат икки ой ичида биринчиси бўлади. Axios маълумотларига кўра, кечаси Нетаньяху вазирлар, ҳарбийлар, разведка хизматлари раҳбарлари билан Эронга ҳужумлар кўлами ҳамда вақтини аниқлаш учун бир неча соат суҳбатлашган.
Исмини ошкор этмаган исроиллик расмийга кўра, Исроилнинг жавоби “аҳамиятли бўлади” ва эҳтимол Эрондаги ҳарбий нишонларга ҳаво ҳужумлари ва Теҳронда ҲАМАС етакчиси Исмоил Ҳания ўлдирилгани каби яширин ҳужумларни ўз ичига олади. Исроил, шунингдек, Эроннинг нефть инфратузилмасини нишонга олишни кўриб чиқмоқда, бироқ Жо Байден бунга қарши.
Reutersъга кўра, Байден қўнғироқ пайтида Исроилнинг жавоби ўринли ёки йўқлиги ҳақида ўз фикрларини билдиришга умид қилмоқда. АҚШ президенти ва Исроил бош вазири Ливан ва Ғазодаги урушларни ҳам муҳокама қилиши кутилмоқда.
- 1 октябрь куни Эрон Исроил томон 180 дан ортиқ баллистик ракета учирган эди.
- Эрон расмийлари мазкур ҳужумни Ливаннинг “Ҳизбуллоҳ” ҳаракати бош котиби Ҳасан Насруллоҳнинг ўлдирилишига жавоб деб атаган.
- Исроил расмийлари жавоб зарбаси бериш билан таҳдид қилган.
- ОАВга кўра, улар Вашингтоннинг эътирозларига қарамай, Теҳроннинг ядровий иншоотларига ҳужум қилишни ҳам кўриб чиқмоқда.
- Кан порталининг ёзишича, АҚШ Эрон нишонларига ҳужум қилишдан воз кечиши учун учун Исроилга товон пули таклиф қилган.
Изоҳ (0)