Исроил ҳарбий ходимлари Ливандаги “Ҳизбуллоҳ” жангчиларининг базаларини текшириш пайтида Россиянинг “энг замонавий” қуролларини топди. Бу ҳақда Исроил бош вазири Биньямин Нетаньяху Франциянинг Le Figaro газетасига берган интервьюсида маълум қилди.
Нетаньяхунинг таъкидлашича, БМТнинг 2006 йилги резолюциясига кўра, Исроил ва Ливан чегараси яқинидан оқиб ўтувчи Летани дарёсининг жанубида фақат Ливан армиясигагина қурол сақлашга рухсат берилган.
Шундай бўлса-да, “Ҳизбуллоҳ” бу ҳудудда юзлаб туннел ва яширин жойларни қазиган, у ерда яқинда бир нечта замонавий рус қуролларини топдик, дейди Исроил бош вазири.
Аввалроқ шунга ўхшаш маълумот The Washington Post газетасида эълон қилинганди. Нашр Исроил расмийларига таяниб, Ливан жанубида армиянинг операцияси давомида Россия ва Хитойнинг танкка қарши қуроллари топилгани ҳақида хабар берганди.
Изоҳ (0)