Исроил армияси Ливанда Бирлашган Миллатлар Ташкилоти тинчликпарвар кучларининг базасига бостириб кирди, камида 15 киши жароҳатланди. Бу ҳақда Euronews хабар берди.
Исроил қўшинлари танк ёрдамида базанинг асосий дарвозасини бузган.
“Биз Исроил армияси ва барча иштирокчиларга БМТ ходимлари ҳамда мол-мулк хавфсизлигини таъминлаш, БМТ биноларининг дахлсизлигини доимо ҳурмат қилиш мажбуриятини эслатамиз”, дейилади Ливандаги БМТ вакиллари баёнотда.
Базага ҳужум Исроил бош вазири Биньямин Нетаньяху БМТ бош котиби Антониу Гутерришни тинчликпарвар кучларни “зарба остидан дарҳол олиб чиқишга” чақирганидан сўнг юз берган.
Исроил Ливан жанубида “Ҳизбуллоҳ”га қарши кампаниясини кучайтирар экан, БМТнинг 10 минг кишилик тинчликпарвар кучлари тобора ҳужумга учрамоқда. Сўнгги кунларда содир бўлган жангларда ташкилотнинг камида 5 нафар тинчликпарвар аскари яраланган.
Сўнгги бир йил ичида Исроил ва “Ҳизбуллоҳ” ўртасидаги можаро қурбонларининг умумий сони 2255 кишини ташкил этган, 10 мингдан ортиқ одам яраланган. Сентябрь ойи ўрталаридан бери эса 1400 дан зиёд киши ҳалок бўлган.
Изоҳ (0)