11 январь куни Андижон вилояти Асака туманидаги автошоҳбекатда ўзбошимчалик билан қуриб олинган савдо дўконини бузиш учун келган МИБ ходимлари ва дўкон эгасининг ўғли Саидмақсудхон Жумаев ўртасида келишмовчилик юз берган. Натижада Саидмақсудхон Жумаев ошхона пичоғи билан тарафларни қўрқитиб, давлат ижрочиси Х.М.га тан жароҳати етказган. Шундан сўнг эҳтиёт чораси сифатида фуқаро қамоққа олинган.
«Дарё» мухбири ҳолат юзасидан суриштирув олиб борди.
Фуқаролик ишлари бўйича Асака туманлараро суди раиси Эркинжон Собировнинг маълум қилишича, 2021 йилнинг 21 сентябрь куни суд биносида даъвогар Асака тумани ҳокимлигининг жавобгар Авлиёхон Жумаевга нисбатан «Ўзбошимчалик билан қурилган ноқонуний қурилмани мажбурий тартибда буздириш ҳақида»ги даъво аризаси кўриб чиқилган. Қарорда автобекатнинг йўловчилар учун мўлжалланган кутиш жойига ўзбошимчалик билан қуриб олинган савдо дўкони жавобгар ҳисобидан мажбурий тартибда буздирилиши белгиланган.
«Суд мажлисида Асака туман ҳокимлигининг ишончли вакили Хотам Қурбонов жавобгар томонидан Асака тумандаги Нажмиддин Кубро кўчасида жойлашган автобекатда ўзбошимчалик билан савдо дўкони қурилиб, фойдаланиб келинаётганлигини, берилган огоҳлантиришга қарамасдан ноқонуний қурилма жавобгар томонидан ихтиёрий равишда бузилмаганлигини билдириб, мазкур ноқонуний қурилган дўконни жавобгар ҳисобидан мажбурий тартибда буздиришни сўраган.
Жавобгар Авлиёхон Жумаев суд мажлисининг вақти ва жойи тўғрисида тегишли тарзда хабардор қилинган бўлишига қарамасдан, судга келмаганлигини ва буни узрли сабабларини судга тақдим қилмаганлигини, ишни ўзининг иштирокисиз кўришни сўрамаганлигини даъвогар вакилининг ишни кўрилишига эътирози йўқлигини инобатга олиб, суд иши кўриб чиқилган.
Даъвогар томон Асака туман қурилиш бўлимининг 2021 йил 25 июндаги хулосаси, ўзбошимчалик билан қурилган иморатларни аниқлаш ҳамда бартараф этишни ташкил этиш бўйича тузилган далолатнома, жавобгарга берилган огоҳлантириш хатларини тақдим қилган.
Унга кўра, савдо дўкони ва автобекат жавобгар Жумаев Авлиёхонга нотариал тасдиқланган шартномага асосан тегишли бўлиб, мулк ҳуқуқи давлат рўйхатидан ўтказилган бўлса-да, бекат қисми йўловчилар учун кутиш жойи сифатида очиқ қолдирилиб, савдо дўкони шаҳарсозлик меъёрлари ва қоидалари талаблари асосида қурилмаганлиги аниқланган.
Сиртдан ҳал қилув қарорига асосан даъвогар Асака туман ҳокимлигининг жавобгар Жумаев Авлиёхонга нисбатан даъво аризаси қаноатлантирилган ҳамда автобекатнинг йўловчилар учун мўлжалланган кутиш жойига ўзбошимчалик билан қуриб олинган савдо дўкони жавобгар ҳисобидан мажбурий тартибда буздирилиши белгиланган», — дейди судья Эркинжон Собиров.
Судьянинг қўшимча қилишича, жавобгар сиртдан чиқарилган қарорни бекор қилишни сўраб, ариза билан мурожаат қилган.
«Мурожаат қилганда қарорни сиртдан қабул қилинган қарорни нотўғри чиқариб қўйган бўлсак, деб тўғрилаб қўйиш учун қайта кўриб чиққанмиз. Шунда Жумаевнинг ўзи келиб ‘Менинг ҳужжатларим бор, сиз мени буздиришга белгилаб қўйибсиз’ деди. Унга жавобан ‘Ҳужжатингиз борлигини биламан, лекин у ер нима десам ‘остановка’, дедим. Кейин муҳокама қилиш жараёнида иккаламиз суддан нари жойни кўриш учун чиқиб кетдик. Борганда одамлар ўтирадиган жой акфа қилиниб, беркитиб қўйилган, эшиклар қулф эди. Ўша ернинг ўзида ‘Ҳужжатим бор, ҳамма нарсам жойида деяпсиз, лекин бу ерга келган фуқаролар қаерда ўтиради? Мисол учун мен йўловчиман дейлик, автомашина кутиш учун қаерда ўтираман’, деган саволлар билан мурожаат қилдим. ‘Болалар эшикни беркитиб қўйибди’, деганда ‘Бекат учун эшикни нима кераги бор’, дедим. Ичкарига кирганимизда ароқ ва сигаретни ҳиди тутаб, тартибсиз ҳолатда эди. Қисқаси уларга акфа эшикларни олиб ташлаб, бекатнинг олд қисмини очишини, ичкаридаги мебеллар ўрнига тахта стулларни қўйишини, деворга илинган телевизорини олиб ташлашини айтдим. Қарорни ўша ерда ўқиб берганимда сиртдан ҳал қилув қарори тўғрилигига ишонч ҳосил қилди. Шундан кейин унинг аризаси рад этилиб, қарор ижроси таъминланиши белгиланди», — дейди Эркинжон Собиров.
Дўкон эгаси Авлиёхон Жумаевнинг «Дарё»га маълум қилишича, дўконини 26 йил аввал сотиб олиб, қонуний ҳужжатлаштирилган.
«Бекатнинг ортида 10 га яқин дўкон бор. Бизнинг дўкон уларни тўсиб қолган. Қўшни дўкон эгаси анча бой одам, бизни йўқотиш мақсадида устимиздан ёзавериб чарчамади. Бундан уч-тўрт йилча аввал ноқонуний қуриб олган деб қандайдир танишлари орқали дўконни буздириб ҳам юборганди. Ўшанда бу бекатнинг фақатгина томи қолганди. Кейин эса томини ҳам буздириш пайига тушишди. Туман прокуратурасига бориб барча ҳужжатларни кўрсатдим. Шундан сўнг дўконни яна қайта қуриб олишимга рухсат беришди. Бинони ўзлари айтгандек қурдим. Лекин бекатнинг бу қисмини ҳам акфа эшик билан беркитиб қўйганим учун яна жанжаллар бошланди.
Рости, бу ернинг бир бурчагини Paynet учун бергандим. Энди эса МИБ келиб ҳаммасини бузасан деб турибди. Ҳокимни муовини келиб,‘Ойналарга ёпиштирилган реклама баннерларини олиб ташланг, ичкарига эса қаттиқ столлар қўйиб қўйинг’деди. Ҳаммасини қилдик. Ўша воқеа юз берган куни МИБ ходими келиб, отангни қаматаман деган экан, ўғлимни жаҳли чиқиб пичоқ билан уни қувлаган. Бор гап шу», — дейди Авлиёхон Жумаев.
Жумаевнинг ўғли Саидмақсудхоннинг айтишича, бинонинг бекат қисмини тоза тутиш учун алюмин эшиклар қўйилган. Бунга ҳокимнинг биринчи ўринбосари рухсат берган.
«Неча йиллардан буён дўкондан фойдаланиб келаётган бўлсак, ёнидаги кутиш қисмида ҳар хил маст-аласт одамлар келиб ўтириб олганини, бу ерда ичкилик ичишларини ҳар куни гувоҳи бўлардик. Эртасига эрталаб аёлим билан келиб уларнинг қолдиқларини тозалаш жонимизга ҳам тегди. Охири бу ерни акфа эшиги билан беркитишни, кундузи эшикларни очиб қўйиб, кечаси уйга қайтаётганда беркитиб қўйишни ўйлаб қолдик. Мана, кўриб турганингиздек бекатнинг бу қисми ҳозир айнан шундай. Биз бу ердан фойда олмаймиз. Буни туман ҳокимининг биринчи ўринбосари ҳам келиб кўриб кетган. Ўзи рухсат берган», — дейди у.
Саидмақсудхон Жумаевнинг таъкидлашича, МИБ ходимларидан бири отаси номига ҳақоратомуз сўзлар айтгани учун жанжал бошланган.
«Ўша куни МИБ ходимлари, маҳаллий ҳокимият вакиллари, кадастр ҳамда участка нозири келиб, шу дўконни бузишимни ва автобекатни ўз ҳолига келтириб қўйишимни айтишди. Ҳеч қандай қаршиликларсиз ишга тушдим. Жараёнларни кўргач, улар кетди. Бир муддат ўтгач, икки нафар МИБ ходими келди. Улар ўзини таништирмади. Ёнимга келиб, бу ер ўзи тўлиқ бузилиши кераклигини айтиб, нега мендан бу реклама банерларни олаётганимни сўрашди. Уларга жавобан эрталаб ҳамма ваколатли орган вакиллари келганини, менга шундай топшириқ берганини, дўкондаги рекламаларни олиб ташлаб, юмшоқ ўриндиқлар ўрнига қаттиқ стуллар қўйишимни айтишганини тушунтирдим. У эса бирданига ‘Буларга жарима солиш керак, жиноий иш қўзғаш керак’ деб отам ҳақида номақбул сўзларни гапирди. Шундан кейин ўзимни йўқотиб қўйдим. Саксон ёшдан ошган отам ҳақида ёмон гапирганига чидаб туролмадим. Шу ёшимда яна отамга гап олиб бераманми, деган хаёл ўрнашиб қолди миямга. Шундан кейин тортишиб кетдик. Қўлимдаги хўжалик пичоғи билан уни қувладим. Тўғриси, ўзимни қўлга ололмай қолдим ўша пайт», — дея Саидмақсудхон ҳолатга изоҳ берди.
«Дарё» мухбири воқеа юзасидан дўкон эгалари айтаётган гаплар қанчалик ҳақиқатга тўғри келиши ҳақида маълумот олиш учун МИБ вилоят бошқармаси ахборот хизмати раҳбари Ойистахон Абдураҳмонова билан боғланди.
«Воқеа юз бергандан сўнг ижрочи келиб, бўлим бошлиғига ҳолат бўйича ҳеч нарса айтмаган. Бироқ жавобгар томон туман прокуратурасига ҳолат бўйича ариза билан мурожаат қилган. Мурожаат асосида прокуратура ходимлари ижрочини чақиртириб, ҳолатни ўрганишган. Ўшанда ижрочи бўлган воқеани батафсил айтиб берган», — деди МИБ матбуот хизмати.
Ойистахон Абдураҳмонованинг қўшимча қилишича, туман прокуратураси кўриб чиқилаётган иш тергов жараёнидалиги сабабли МИБ ходимларига журналистлар саволларига жавоб беришини тақиқлаган.
«Дарё» воқеалар ривожини кузатиб боради.
Изоҳ (0)