“Биз ҳуқуқий баҳо беролмаймиз” — Судьялар олий кенгаши вакили собиқ вазир очиқ судини ёпиқ тарзда ўтказишга қарор қилган судья ҳақида

Собиқ қишлоқ хўжалиги вазири Азиз Воитов ва 49 нафар судланувчи иши очиқ суд мажлисидан ёпиқ суд мажлисига айлантирилиб, кўрила бошланганди. Судьялар олий кенгаши масъулларига кўра, судьянинг бу ажримини ўзгартириш фақатгина тарафлар эътирозидан келиб чиқиб юқори турувчи инстанцияда бекор қилиниши мумкин. 

“Бу судьянинг процессуал ҳаракатлари ҳисобланади. Судьянинг бу процессуал ҳаракатларига Судьялар олиш кенгаши ҳуқуқий баҳо бериш ваколатига эга эмас. Фақатгина юқори суд инстанцияси кўриб чиқиши мумкин”, дейди бу ҳақда гапирган Судьялар олий кенгаши раисининг матбуот котиби Турсунали Акбаров. 

Судьялар олий кенгаши раисининг ахборот сиёсати масалалари бўйича маслаҳатчисига кўра, Азиз Воитов ва 49 нафар судланувчи иши ҳақиқатдан ҳам очиқ суд мажлисида кўрила бошланган. Судда журналистлар фаолиятининг чекланиши эса тарафлар фикридан келиб чиқилган ҳолда амалга оширилган. 

“Биринчи суд ажримида судда журналистларнинг иштирок этишига ҳеч қандай монелик йўқлиги, фақат уларнинг иш қуролларидан фойдаланиб, фото, видео ва аудиоматериаллар олиши суд ишига раислик этувчининг рухсати билан амалга оширилади дейилганди. Бу қонунда ҳам бор. Жиноят процессуал талабларидан келиб чиқадиган бўлсак, жараённи оммага ёритишда, суднинг очиқлигини таъминлашда албатта тарафлар фикри инобатга олинади. Эсингизда бўлса дастлабки суд мажлисларида айрим судланувчиларнинг адвокатлари жараённи тасвирга олишга эътироз қилишганди.

Эътирозлардан келиб чиқиб, суд шундай тўхтамга келган. Суднинг ёпиқ тарзда ўтказилишига келадиган бўлсак, кейинги суд мажлисларида судланувчиларнинг адвокатларидан талабнома тушиб, суд ёпиқ тарзда кўрилса, журналистлар иштирок этмаса, деган илтимоснома берилди. Бу илтимоснома ҳам муҳокама қилинди ва судда ишни кўриш жараёнида айрим аҳамиятли маълумотларнинг сизиб чиқишининг олдини олиш, шунингдек, судга ижтимоий босимлар бўлишининг олдини олиш мақсадида судни ёпиқ тарзда ўтказиш бўйича ажрим чиқарилди. Бу ажримга нисбатан норозилар бўлса, бу ҳақда суд инстанциясига мурожаат қилишлари мумкин”, деди Турсунали Акбаров.