Тошкент вилояти Оҳангарон тумани судида манзил колонияда жазо муддатларини ўтаётган 14 нафар шахснинг иши кўриб чиқилган. Бу ҳақда инсон ҳуқуқлари “Эзгулик” жамияти раиси Абдураҳмон Ташанов хабар бермоқда.
Абдураҳмон Ташановнинг айтишича, 8 октябрь куни жиноят ишлари бўйича Тошкент вилояти Оҳангарон тумани судида манзил колонияда жазо муддатларини ўтаётган 14 нафар шахснинг иши кўриб чиқилган. Судда жамият фаоли Зариф Мирзаахмедов маҳкум Илҳом Каримовнинг ҳуқуқларини ҳимоя қилган.
Судья Сардор Бобоқулов маҳкамага судьяларнинг либоси — мантия киймай чиқди. Маҳкама жараёнида суд баённомаси юритилмади, савол-жавоблардан сўнг маҳкумларга нисбатан ажрим чиқарилди, судья маҳкамани ёпди.
Ҳуқуқ ҳимоячиси Зариф Мирзаахмедов бу ҳолат юзасидан суд раисига шикоят қилди. Суд раиси дарҳол чора кўришини айтди. Судья Сардор Бобоқулов маҳкумларни суд залига қайта киритиб, мантия билан чиқди. Котиб баённома юритди, маҳкама видеога олинди. Гўё, ҳаммаси жойида.
Судни, қонунчиликни тушунмаган одам бу ерда қандай қабиҳлик борлигини ҳам тушунмайди. Аслида судья нафақат қонунни бузди, чуқурроқ қаралса жиноят ҳам қилди. Яъни, унинг маҳкамани мантиясиз ўтказгани касбий профессионал фаолиятига нисбатан ҳурматсизлигидир, бунга интизомий чора ҳам қўлланар, бунда гап йўқ, дейди инсон ҳуқуқлари фаоли.
Унинг қўшимча қилинишича, ҳукм ўқилгач, қайта маҳкама ўтказиш бу жиддий қонунбузарлик.
Судьялар олий кенгаши матбуот хизматининг маълум қилишича, ҳолат бўйича хизмат текшируви тайинланган.
“Тошкент вилоят суди судьялари малака ҳайъати томонидан ўтказиладиган хизмат текшируви натижаси юзасидан қўшимча ахборот берилади”, дейилади кенгаш ахборотида.
Изоҳ (0)