Қашқадарё вилоятида судья ёрдамчиси сифатида ишлаган фуқаро уни ишдан бўшатган суд раисини судга берди. Бу ҳақда Telegram каналларида хабар тарқалди.
Маълум бўлишича, собиқ судья ёрдамчиси Фуқаролик ишлари бўйича Қарши туманлараро суди раиси буйруғини бекор қилиш учун айнан шу суднинг ўзига мурожаат қилган.
Даъво аризасида ёзилишича, ишдан бўшатилган судья ёрдамчиси Қарши туманлараро судида 2023 йилнинг 3 апрель кунидан шу лавозимда иш бошлаб, 2024 йилнинг 13 майидан эса девонхона ходими сифатида фаолият юритган.
Фуқаролик ишлари бўйича Қарши туманлараро судининг 6 сентябрдаги 48-сонли буйруғига кўра Меҳнат кодексининг 161-моддаси 5-бандига мувофиқ ишдан бўшатилдим. Иш берувчи томонидан бирор марта ҳам интизомий жавобгарликка тортилмаганман, дейди даъвогар даъво аризасида.
Аризада ёзилишича, Қарши туманлараро суди раиси Ўрал Неъматиллаев ёрдамчисига ариза ёзасан дея босим ўтказган. Бироқ ёрдамчи буни рад этган.
Ўрал Неъматиллаев 2024 йилнинг 19—20 август кунлари мени ишга чиқмаган деб Касаба уюшмасига тақдимнома киритган. Мен эса ўша куни тўлиқ ишда ўтириб, Адолат ахборот тизимлар комплексига шахсий электрон имзом орқали 213 та ариза, даъво аризалар, 20 август куни ҳам 228 та ариза ва даъво аризаларни кирим қилганман, дейди собиқ судья ёрдамчиси даъво киритар экан.
Даъвогарнинг қўшимча қилишича, суд раиси уни ишдан бўшатиш учун 3 кун олдин огоҳлантириш бериб, бу ҳақда йиғилиш қилиши ва уни расман огоҳлантириши лозим бўлган. Бироқ бундай қилинмаган.
Қашқадарё вилоят суди ахборот хизматининг “Дарё”га билдиришича, мазкур даъво аризаси адолатни таъминлаш, ишнинг ҳаққоний кўришилишига эришиш учун бошқа судга юборилиши мумкин.
Изоҳ (0)