«Янгиобод» сайёҳлик базасининг мулкдор томонидан мажбурий баҳоланиши ҳақидаги суд қарори ўзгаришсиз қолди

Тошкент вилояти Анген туманида жойлашган «Янгиобод» сайёҳлик базаси унинг мулкдори томонидан ўз ҳисобидан мажбурий тартибда баҳоланиши ва баҳолаш натижаларини Ангрен шаҳар ҳокимлигига тақдим этиши ҳақидаги суд қарори ўзгаришсиз қолди. Мазкур қарор Оҳангарон туманлараро иқтисодий суди томонидан 2020 йил 24 январда қабул қилинган эди.

Ўзбекистон Олий суди ахборот хизмати томонидан маълум қилинишича, 2020 йилнинг 5 март куни Тошкент шаҳар иқтисодий судининг апелляция инстанцияси сайёҳлик базаси эгаси томонидан берилган аппеляция шикоятини кўриб чиққан.

Қайд этилишича, даъвогарлар Ангрен шаҳар прокурори ва Ангрен шаҳар ҳокимлиги Оҳангарон туманлараро иқтисодий судига даъво ариза билан мурожаат қилиб, жавобгар «Янгиабад Жемчужина Чаткала» масъулияти чекланган жамиятининг зиммасига умумий майдони 10 гектардан иборат бўлган ер участкаси ҳамда ушбу ер участкасида жойлашган бино ва иншоотларни ўз ҳисобидан баҳолаб, баҳолаш ҳисоботини Ангрен шаҳар ҳокимлигига тақдим этиш мажбуриятини юклашни сўраган.

Суднинг 2020 йил 15 январдаги ажримига асосан, ишга низонинг предметига нисбатан мустақил талаблар билан арз қилмайдиган учинчи шахс сифатида Тошкент вилояти Ер ресурслари ва давлат кадастри бошқармасининг Ангрен шаҳар бўлими жалб қилинган.

Ишни биринчи инстация судида кўриш жараёнида Ангрен шаҳар прокурори қўшимча даъво аризасини тақдим этиб, жавобгарга сайёҳлик базасини Ангрен шаҳар ҳокимлигига топшириш мажбуриятини юклашни сўраган. Оҳангарон туманлараро иқтисодий судининг 2020 йил 24 январдаги ҳал қилув қарори билан даъвогарнинг даъво аризаси қаноатлантирилган.

Маълум қилинишича, ҳал қилув қарори устидан жавобгар томонидан апелляция шикояти берилиб, ҳал қилув қарорини бекор қилиш ва иш юритишни тугатиш тўғрисидаги талаблар қўйилган.

Олий суд томонидан қайд этилишича, 5 март куни бўлиб ўтган суд мажлисида иштирок этган Тошкент шаҳар прокурори ёрдамчиси апелляция шикоятини рад қилишни ва ҳал қилув қарорини ўзгаришсиз қолдиришни сўраган.

Суд муҳокамасининг вақти ва жойи тўғрисида тегишли тартибда хабардор қилинган тарафлар вакиллари апелляция инстанциясининг суд мажлисида иштирок этмаган, дейилади хабарда.

«Gazeta.uz»нинг ёзишича, «Янгиобод» сайёҳлик базаси Оҳангарон туманлараро иқтисодий судининг қарори устидан апелляция шикояти берган. «Янгиобод» сайёҳлик базаси адвокати Азимжон Раҳматовнинг айтишича, суд мажлиси 5 март куни Тошкент вилояти иқтисодий судининг апелляция инстанциясида бўлиб ўтиши керак эди, аммо ўша куни сайёҳлик базаси вакиллари кворум (апелляцияни кўриб чиқадиган судьяларнинг етарли сони) йиғилмагани сабабли иш кўрилмаслиги тўғрисида хабардор қилинган.

Унинг сўзларига кўра, уларга Олий суд ишни кўриб чиқиш учун қаерга юборишни белгилаши кераклиги маълум қилинган. Бу Тошкент шаҳар иқтисодий суди ёки Сирдарё вилоят иқтисодий суди бўлиши мумкинлиги айтилган.

Бироқ кейинчалик маълум бўлишича, иш Тошкент шаҳар иқтисодий судининг апелляция инстанциясига юборилган ва суд мажлиси 5 март куни бўлиб ўтган. Суд иши баённомасида билдиришномага қарамай, даъвогар томони судда иштирок этмагани кўрсатилган.

Сайёҳлик базаси эгаси Али Тўхтаев иш материаллари билан фақат 15 март куни, давлат ижрочилари суд қарорининг нусхасини олиб келганида танишган. Сайёҳлик базаси адвокати ушбу масала бўйича Олий судга назорат шикояти берилишини маълум қилган.

«Ушбу масала бўйича биз Олий судга назорат шикоятини юборамиз. Хусусан, процессуал қоидаларни қўпол равишда бузганликлари учун. Иш бир суддан бошқасига ўтказилганлиги сабабли, ишни кўриб чиқиш учун қабул қилган судья суд муҳокамаси куни ва вақти тўғрисида тарафларни хабардор қилиши керак эди. Бундай огоҳлантириш бўлмаган», — деди адвокат.

Шунингдек, адвокат иш материалларида судья А.Нарзуллаевнинг ишни тайёрлаш учун қабул қилиш ҳамда суд мажлисининг санаси ва вақтини белгилаш тўғрисидаги қарори мавжуд эмаслигини таъкидлаган.

«Gazeta.uz»нинг ёзишича, «Янгиобод» сайёҳлик базаси иши Тошкент шаҳар иқтисодий судининг иш жадвалида ҳам кўрсатилмаган.

Сайёҳлик базаси эгаси Али Тўхтаев мазкур ҳолат бўйича бизнес-омбудсманга ҳам мурожаат қилган.

Компания олдинги суд қарорларини бекор қилиш учун Олий суднинг Маъмурий ишлар бўйича суд ҳайъатига назорат шикоятини юборган, аммо 4 февраль куни рад жавобини олган.

Шунингдек, Али Тўхтаев Олий суд раиси Козимжон Комилов номига назорат шикояти юзасидан ариза ёзган ва ҳозирча жавоб кутмоқда.