Даҳо ёки иқтидорли инсон бўлиш кўп жиҳатдан қўл келади. Бундай ҳолларда камида кам куч сарфлаб ва жисмоний меҳнат қилмасдан ўқишда (талаба сифатида) ёки ишда (ходим сифатида) муваффақиятга эришиш мумкин.
“Ҳайвонлар сайёраси”
“Ҳайвонлар сайёраси”да “тош-қайчи-қоғоз” ўйинининг ноодатий версияси тасвирланган. Ҳар бир ўйинчи 12 та карта олади ва уларни ўйинда юлдуз ютиш ёки йўқотиш учун ишлатиши керак. Фильмнинг бош қаҳрамони — Чжен Кайси ажойиб таҳлилий қобилиятга эга ва мураккаб стратегиялар ишлаб чиқади. Ғалабага яқинлашганида эса кутилмаган ҳодисалар унинг йўлини тўсади. Фильмда бош қаҳрамоннинг фикрлаш жараёнлари ажойиб акс эттирилган.
“Матилда”
Фильм сюжетининг асосида Матилда исмли қизалоқнинг ҳикояси ётади. У қаттиққўл оилада яшайди. Матилда мактабга боришни жуда хоҳлайди, лекин ота-онаси бунга қарши. Натижада у Кранчем Холл бошланғич мактабига боришга мажбур бўлади. Мактаб директори мисс Транчбул пайдо бўлгач, Матилданинг мактабдаги ҳаёти қўрқинчли синовларга тўлади. Фильмнинг энг қизиқарли воқеаларидан бири — Матилда ўзининг ноодатий қобилиятини мисс Транчбулни мактабдан ҳайдаш учун ишлатганидир.
“Кичкинтой Тейт”
Ёлғизликда даҳо болани тарбиялаш осон эмас — “Кичкинтой Тейт” фильми айнан шу мавзуда. Фильмда боланинг нормал ҳаёт кечиришига тўсқинлик қилувчи ташқи омилларга алоҳида эътибор қаратилган. Дидининг ўғли Фредди ғоят заковатли бўлиб, жамиятдан қисман ажралиб қолади. У истеъдодли болалар учун мўлжалланган мактабда ўқийди, танловларда қатнашади ва ҳатто квант физикасини ўрганишни бошлайди.
“Ўйин танлови”
“Ўйин танлови” фильми ҳақиқий шахмат даҳоси Жош Вайцкин ҳақида ҳикоя қилади. Жош 1993 ва 1994 йилларда АҚШда ўсмирлар ўртасидаги шахмат чемпионатида ғолиб бўлган. Фильм отаси Фред Вайцкин ёзган шу номли китоб асосида суратга олинган.
Жош шахматга ёшлигида қизиқади, у шунчалик истеъдодли эдики, етти ёшидаёқ профессионал майдонга чиқади, бу эса унинг руҳий саломатлигига катта таъсир қилади. Фильмда Жошнинг икки хил ўйин услуби кўрсатилган: бири — хавфли ва тезкор, у хиёбонларда ўйнайдиган ўйинчилардан; иккинчиси эса — тартибли ва қоидаларга мос, шахмат ўқитувчисидан ўрганган услуби.
Фильмда яна кўплаб қизиқарли тафсилотлар, таққослар ва ўхшатишлар бор. Уларни яхшироқ тушуниш учун албатта фильмни томоша қилиш керак.
“Заковатли Уилл Ҳантинг”
Фильмда Метт Деймон Уилл Ҳантинг ролини ижро этади. У шундай мураккаб математик тенгламаларни еча олади, ҳатто энг таниқли олимлар ҳам бунга қодир эмас. Аммо Уилл юксак интеллектига қарамай, ўжар ва тарбиясиз, бу эса истеъдодини йўқотишига олиб келади.
Фильм марказида Уиллнинг хулқи ва унинг ёрқин келажаги туради. Шу билан бирга, унинг ўтмишидаги қийинчиликлари очиб берилади, бу эса унинг дийдасини қотирган ва уни яна қайта жароҳат олишдан қўрқиб, ҳаммани ўзидан узоқлаштиришга мажбур қилган.
Уиллнинг ҳаётида муҳим рол ўйнаган икки шахс бор: бири профессор, у Уиллнинг интеллектуал салоҳиятини тўлиқ очиб, уни муваффақиятга етаклашга ҳаракат қилади. Иккинчиси психотерапевт бўлиб, у Уиллга ҳиссий тикланишда ёрдам беради.
“Пиёдани қурбон қилиш”
Агар “Ўйин танлови” фильмида Бобби Фишер фақат иккинчи даражали рол ўйнаган бўлса, “Пиёдани қурбон қилиш”да воқеа айнан Бобби Фишер ҳақида.
Фильмда Бобби Фишернинг (Тоби Магуайр) шахмат ўйнашни қандай бошлагани ва ўз даврининг энг буюк шахматчиларига қарши курашдаги муваффақиятлари ҳикоя қилинади.
Фильмда бир нечта мавзулар, жумладан, Совуқ уруш ва СССРнинг профессионал шахматдаги устунлиги бирлаштирилган бўлса-да, Фишернинг ҳаёти катта ўринни эгаллайди ва томошабинларга тарихдаги энг истеъдодли шахматчилардан бирининг ҳаёти очиб берилади.
“Стивен Ҳокинг коиноти”
Кўпчилик машҳур назариётчи физик Стивен Ҳокинг номини эшитган, у фан ривожига улкан ҳисса қўшган замонавий Эйнштейн саналади.
Соғлиғининг ёмонлашувига қарамай, Хокинг барча қийинчиликларни енгиб ўтиб, бутун дунё бўйлаб миллионлаб одамларни илҳомлантирди. У “Вақтнинг қисқа тарих” номли бесцеллер китоб муаллифи сифатида ҳам танилган.
Мазкур фильм унинг биринчи рафиқаси Жейн томонидан ёзилган “Чексизликка саёҳат: Стивен билан ўтган ҳаётим” китоби асосида экранлаштирилган. Фильм Ҳокингнинг ҳаётини ёритиб беради.
Гарчи фильмда Ҳокингнинг илмий ишлари ҳам ёритилган бўлса-да, асосий эътибор Стивен ва Жейннинг севги ҳикоясига қаратилган. Бу ҳикоя бир вақтнинг ўзида ҳам романтик, ҳам юракни эзадиган даражада таъсирли.
Изоҳ (0)