Қозоғистонда 16 ёшли ўсмир ўлдириб кетилди, шаҳар ҳокими ишдан олинди

Қозоғистоннинг Олмаота вилоятидаги Талгар шаҳри мери Бахит Куришбеков ва унинг ўринбосари 16 ёшли ўсмирнинг шов-шувли ўлими ортидан ўз лавозимларидан четлаштирилди. Марҳумнинг ўлими ортидан Талгар шаҳрига Миллий гвардия олиб келинган. Бу ҳақда Tengrinews хабар берди.

“Вазифаларини лозим даражада бажармагани учун Талгар шаҳар ҳокими Қуришбеков Бахит Куатбекович, ҳоким ўринбосари Матан Сағиндиқ эгаллаб турган лавозимидан озод этилди”, дейилади хабарда.

Куришбеков 2022 йил июнь ойида шаҳар ҳокимлигига сайловда ғалаба қозонганди. Ҳоким ишдан бўшатилишидан олдин 4 октябрга ўтар кечаси Талгар дўконларидан бирида ўсмирнинг шов-шувли ўлдирилиши содир бўлган. Ўша куни маҳаллий дўконга тажовузкор кайфиятдаги харидор келган, у билан ходимлар ўртасида жанжал бошланган. Ўсмир шу пайт дўконга отасининг олдига келган.

Можаро авж олгач, мижоз ўз танишларини чақирган — уларнинг барчаси совуқ ва ўқотар қуроллар билан қуролланган. Воқеа жойига етиб келгач, улар ўсмирга, унинг отаси ва амакисига ҳужум қилган. Оқибатда ўсмир ҳалок бўлган.

Ўғлини ўлдиришаётганда, онасини икки киши ушлаб турган. Она ўғлини урмасликларини ёлвориб сўраган. Амакисига ҳам пичоқ билан жароҳат етказишган. Бувисини бир четга итариб юборишган, шундан сўнг у ҳушидан кетган. Марҳумнинг отаси икки киши билан олишган, фақат улардагина пичоқ бор деб ўйлаган. Аммо, афсуски, ҳаммаси қуролланган бўлган. Қотилликдан кейин улар дўконни ҳам талашган, дейди марҳумнинг қариндошлари.

12 октябрь куни ҳалок бўлган ўсмирнинг уйи ёқиб юборилган. Шу муносабат билан боланинг оиласини ҳимоя қилиш мақсадида полиция ходимлари томонидан кеча-ю кундуз навбатчилик ташкил этилган.

Ушбу иш бўйича терговни ички ишлар вазири Ержан Саденов шахсан назоратга олган, Талгарга эса Қозоғистон Ички ишлар вазирлиги Миллий гвардиясининг шахсий таркиби юборилган. Олмаота вилояти прокуратурасининг маълум қилишича, жиноят содир этишда гумон қилинган етти нафар шахс қўлга олинган. Суд уларни икки ойга қамоққа олиш ҳақида қарор чиқарди.

Ҳалок бўлган ўсмирнинг отаси Қаржаубай Нўримов президент Қосим-Жўмарт Тўқаевдан ўз оиласини Олмаота вилоятидан олиб чиқиб кетишни сўраган.