“Ғишткўприк” чегара божхона пости орқали қўшни мамлакатдан кириб келаётган фуқаро дориларни яшириб ўтмоқчи бўлди. Бу ҳақда Тошкент вилояти божхона бошқармаси ахборот хизмати “Дарё”га маълум қилди.
Ўтказилган шахсий кўрик натижасида фуқаро танасининг бел ва оёқ қисмларига олдиндан яшириб олинган, оғзаки сўровда маълум қилинмаган, декларация қилинмаган, хорижда ишлаб чиқарилган 116 миллион сўмлик дори воситалари борлиги аниқланган.
Яна бир ҳолатда, хориждан “Нажимов” чегара божхона пости орқали Ўзбекистонда фаолият олиб бораётган якка тартибда тадбиркорнинг номига олиб келинган товарлар билан юкланган юк автотранспорт воситаси белгиланган тартибда божхона кўригидан ўтказилган.
“Табиий асал” номли товар холислар иштирокида божхона кўригидан ўтказилганида, божхона назоратига тақдим қилинмаган, юк кузатув ҳужжатларида кўрсатилмаган, 3 турдаги 17 минг 735 дона “Бипин-Т”, “Бисанар” ҳамда “Оксибактоцид” номли дори воситалари борлиги аниқланган.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом этмоқда.
Бошқарма томонидан жорий йилнинг 9 ойи давомида қиймати 3 миллиард 690 миллион сўмлик 490 минг 704 минг дона сифати кафолатланмаган дори воситаларининг ноқонуний айланмасига чек қўйилган.
Аввалроқ Туркиядаги аэропортда олтин қуймаларини ноқонуний олиб ўтишга уринган 6 нафар ўзбекистонлик аёл ушлангани ҳам хабар қилинган эди. Уларнинг ёнидан ҳар бири 110 граммлик 82 дона олтин қуймалари, 18 дона ўйин приставкалари (Playstation), шунингдек, 3 дона смартфон топилган.
Суд қарори билан қўшимча текширув ўтказилганида эса аёллар жинсий азосида 84 дона олтин қуймалари яширилгани аниқланган. Жарроҳлик йўли билан чиқариб олинган олтин қуймаларининг умумий оғирлиги 9,2 килограммни ташкил этган.
Изоҳ (0)