Сирдарёда ўқитувчи 1-синф ўқувчисини қўлига игна санчиш билан жазолангани ҳақида хабарлар тарқалганди. Вилоят ИИБ ҳолатга муносабат билдирди.
Аниқланишича, 14 октябрь куни фуқаро Э.Ғ. ИИБ га мурожаат қилиб, Сирдарё туманидаги 27-сонли мактабнинг А.Г. исмли аёл ўқитувчиси мактабнинг 1-синфида таҳсил олаётган, 2017 йилда туғилган қизи Ғ.О.нинг қўлига игна тиққани ва ҳожатхонага чиқармасдан тазйиқ ўтказганини билдирган.
Ҳолат юзасидан Сирдарё тумани ИИБ ЖХХ HPБ томонидан терговга қадар текширув ҳаракатлари олиб борилди. Суриштирув давомида мутахассислар томонидан ушбу мактабнинг 1-“E” синф ўқувчилари ҳамда уларнинг ота-оналари билан суҳбат ўтказганида суҳбатда иштирок этган 28 нафар ўқувчи ўқитувчиси ҳеч қанақа қўполлик қилмаганини, Ғ.О.ни уришмаганини, унга игна тиқмаганини билдирган.
Суриштирув давомида юқоридаги ҳолат тасдиғини топмаган. Ота-оналар томонидан эса ўқитувчи ижобий тавсифланган. Ҳозирда суриштирув ишлари давом этмоқда. Вояга етмаган Ғ.О.нинг тан жароҳати юзасидан суд-тиббиёт экспертизаси тайинланган.
Аввалроқ болалар омбудсмани ҳам муносабат билдириб, мазкур ҳолатни ўрганилаётганини маълум қилганди.
Изоҳ (0)