Олий Мажлис Сенати эксперти Носиржон Зокиров «Дарё» мухбирига берган интервьюсида баъзи нопрофессионал ҳайдовчиларнинг хатоси билан бегуноҳ инсонлар вафот этаётганини айтиб ўтди.
«Шу йилнинг март ойида Тошкентдаги Мирзо Улуғбек кўчасида ҳайдовчи хавфсизликни таъминлай олмай, ўртадаги ажратувчи йўлакдан ўтиб, қарама-қарши томондан келаётган транспорт воситаси билан тўқнашиб кетган. Натижада қарама-қарши томондан келаётган автомобилда бўлган, ҳеч нарсани англаб етишга улгурмаган икки киши ҳаётдан кўз юмди. Шу вазиятни бир кўриб чиқсак: ёмғир ёғиб турибди, йўл сирпанчиқ, тормоз бериб бўлмайди. Ҳайдовчи эса шуни тушунмагани ёки билмагани учун катта тезликда келиб, бир сонияда бошқарувни йўқотиб, фожиали ЙТҲга сабабчи бўлди», – деди Носиржон Зокиров.
Олий Мажлис экспертининг таҳлилларига кўра, ҳозирги кундан ҳеч ким йўл-транспорт ҳодисасига учрамаслиги кафолатланмаган.
«Афсус, бу даҳшат! Мен «даҳшат» деган сўзни ёмон кўраман. Ҳеч биримизнинг ЙТҲга учрамаслигимиз ва ўлмаслигимиз кафолатланмаган. Чунки мен эмас, биров келиб автомобиль билан урса ёки устимизга келиб ағанаб тушса, нима қиламиз? Ҳеч нарса қилолмаймиз! Ҳар кун кечга бориб уйга қайтганимда шукр, омон-эсон келдим, деб айтаман. Кўча-кўйда болаларимиз, набираларимиз юради. Биз уларнинг хавфсиз бўлишини хоҳлаймиз», – деди у.
Экспертнинг алоҳида таъкидлашича, қотиллик ёки бошқа жиноятлар камаймоқда, лекин ЙТҲда ҳалок бўлаётганлар сони камаяётгани йўқ.
Аввалроқ Носиржон Зокиров автомактабларда оддий тестни тўғри ечолмайдиган ўқитувчилар борлиги ҳақида айтиб ўтган эди.
Изоҳ (0)