Бухоро вилоятининг Когон туманида автобус ва юк машинаси иштирокида ЙТҲ содир бўлгани хабар берилганди. “Дарё” манбасининг билдиришича, ағдарилган автобус ичида мактаб ўқувчилари бўлган.
Вилоятнинг Когон туманидаги мактаблардан бирида таҳсил олувчи ўқувчилар мактаб раҳбариятининг талабига кўра, театр томошасига олиб кетилаётганда ЙТҲга учраган. Бир нафар ўқувчи вафот этган.
Манбанинг билдиришича, ўқувчилар минган автобус 2 та бўлган.
Мактабнинг 9—11-синфларидан иборат болалар 2 та автобусга — ўғил болалар алоҳида, қиз болалар алоҳида жойлаштирилган. Воқеа кундузи тахминан 10:30 лар атрофида содир бўлган, — дейди ЙТҲга аниқлик киритган манба.
Билдирилишича, ўқувчиларнинг кўпчилиги театр томошасига боришни истамаса-да, мактаб раҳбарияти юқори синф ўқувчи болаларнинг ҳар биридан 15 минг сўмдан йиғиб олиб, уларни вилоят Мусиқали драма театрига олиб кетаётган бўлган.
Кўпчилик ўқувчи театрга боришни истамаган. Бироқ ҳамма бориши керак деб, уларни олиб кетишаётган бўлган. Соат тахминан 10:30 ларда ўғил болалар минган автобусга цемент қорувчи махсус автомобиль тегиб кетган. Шунда автобус ағдарилган. Воқеа ўқувчи қизлар кўз ўнгида содир бўлган — дейди воқеа тафсилотини гапирган манба.
Қўшимча қилинишича, ЙТҲ оқибатида 11-синф ўқувчиси (ўғил бола) вафот этган. Бир неча ўқувчи оғир тан жароҳати олиб, шифохонанинг жонлантириш бўлимига ётқизилган.
Масъуллар воқеа ҳақида ҳеч қаерда маълумот беришмаяпти. Негадир ҳолат яширилмоқда. ЙТҲдан жабр олганлар жуда кўп, — дейди ахборот берувчи манба.
“Дарё” журналисти ЙТҲ ҳақида қўшимча маълумот олиш учун вилоят прокуратураси ахборот хизмати билан боғланди. Масъул айни пайтда уларда бу ҳақда батафсил маълумот йўқлигини, тез орада қўшимча ахборот берилишини билдирди.
Изоҳ (0)