Россиянинг Самара вилояти Ставропол районида 16 январь куни ўзбекистонликлар бўлган машина йўл-транспорт ҳодисасига учради. Бу ҳақда Самара вилояти прокуратураси хабар берди.
Маълум қилинишича, маҳаллий вақт билан тахминан соат 11:30 да Болшая Рязань қишлоғи яқинида М-5 Урал автомагистралининг 745-километрида иккита автомобиль иштирокида ЙТҲ содир бўлган. Дастлабки маълумотларга кўра, Lada Largus ҳайдовчиси бошқарувни йўқотиб, қарама-қарши йўналишга чиқиб кетган ва юк машинаси билан тўқнашган.
Ҳодиса жойида ҳуқуқ-тартибот идоралари ва қутқарув хизматлари ишламоқда. Вазиятдан хабардор манбага кўра, Largus’да етти киши бўлган. Уларнинг барчаси Ўзбекистон фуқаролари. Ҳодиса оқибатида уч нафари ҳалок бўлган, тўрт нафари шифохонага ётқизилган.
Эслатиб ўтамиз, 11 январь куни Россиянинг Пенза вилоятида йўл-транспорт ҳодисаси оқибатида саккиз нафар ўзбекистонлик ҳалок бўлганди. Пенза вилоятида JAC русумли микроавтобус қарама-қарши йўлга чиқиб кетиши оқибатида Volvo юк машинаси билан тўқнашган. Микроавтобус ичида кетаётган Ўзбекистон фуқароларининг 8 нафари ҳалок бўлган.
Президенти топшириғи билан Мудофаа вазирлигининг махсус самолёти 8 нафар ўзбекистонликнинг жасадини Урганчга олиб келган.
Изоҳ (0)