Россиялик спортчи Барселона шаҳрида ўтказилган Ironman триатлон мусобақаси чоғида чўкиб кетди.
Манбага кўра, воқеа 6 октябрь, якшанба куни содир бўлган. Сузиш бошланганидан кўп ўтмай сувдан 41 ёшли россиялик аёлнинг ҳушсиз танаси топилган. Маҳаллий шифокорлар гуруҳи спортчини жонлантиришга ҳаракат қилган, бироқ шифокорларнинг уринишларига қарамай, аёл тез ёрдам машинасида касалхонага олиб кетилаётганда йўлда вафот этган.
Фожиадан бир неча соат ўтгач, россиялик аёлнинг ўлим ҳолати бўйича тергов бошланди.
“Биз спортчининг оила аъзолари ва дўстларига чуқур ҳамдардлик билдирамиз ва ушбу оғир дамларда уларни қўллаб-қувватлашда давом этамиз. Триатлончига тиббий ёрдам кўрсатишда тезкорлик билан ишлаган денгиз қутқарув гуруҳи, тиббиёт ходимлари ва кўнгиллиларга миннатдорлик билдирамиз”, дейилади турнир ташкилотчилари баёнотида.
Ironman мусобақаси уч босқичда бўлиб ўтади: Ўрта ер денгизида 3800 м сузиш, 180,25 км йўлда велосипед ҳайдаш ва 42,195 км марафон пойгаси.
Изоҳ (0)