Туркияда 6 февраль куни содир бўлган кучли ер қимирлашлари оқибатида содир бўлган фалокатлар сабаб мамлакатдаги барча спорт тадбирлари бекор қилинди.
Бу ҳақда Туркия Ёшлар ва спорт вазири Меҳмет Муҳаррам Касапўғлу маълум қилди.
Хабарларга кўра, “Малатяспор” футбол клуби дарвозабони Айюб Туркаслан зилзила оқибатида вафот этган. Зилзила марказларидан бири бўлган Ҳатай вилоятининг “Ҳатайспор” клубининг 4 нафар футболчиси ва мураббийлар штабининг икки вакили харобалар остидан қутқариб олинган. Ҳозирча клубнинг спорт директори ва “Челси” собиқ футболчиси Кристиан Ацунинг тақдири номаълумлигича қолмоқда.
Туркияда бўлиб турган ўзбекистонлик спортчиларда нима гап?
Туркияга мусобақа ва машғулотларга жўнаб кетган Ўзбекистон спорт делегацияси аъзоларига зилзила оқибатида зарар етмаган, дея маълум қилмоқда Ёшлар сиёсати ва спорт вазирлиги. Қайд этилишича, вазирлик ва МОҚ ўзбекистонлик спортчилар билан доимий мулоқотда бўлиб турибди ҳамда уларнинг ҳолати доимий тарзда назорат қилиб борилмоқда.
Эркин кураш бўйича Ўзбекистон ёшлар терма жамоаси Туркиянинг Кахраманмараш шаҳрида 3—6 февраль кунлари ўтиши белгиланган халқаро мусобақада иштирок этаётган эди. Бироқ мазкур ҳудуд айни пайтда зилзила эпитцентрига айланиб қолди. Айни пайтда Ўзбекистоннинг Туркиядаги элчихонаси ёрдами билан спортчиларни Анқара шаҳрига жўнатиш чоралари кўрилмоқда. Шундан сўнг терма жамоа Анқара—Истанбул—Тошкент йўналиши бўйича Ўзбекистонга қайтиб келади. Ҳозирда спортчи ва мураббийларнинг барчалари соғ-саломат, — дейилади баёнотда.
Шунингдек, ЎФА Туркияда ўқув-машғулот йиғинлари ўтказаётган футбол бўйича Ўзбекистоннинг турли ёшдаги терма жамоалари вакилларига зилзила оқибатида зарар етмаганини маълум қилган.
Изоҳ (0)