Паралимпия якунлари: Ўзбекистон спортчилари тарихий натижа қайд этди

Париж Паралимпиадаси Ўзбекистон делегацияси учун омадли келди. Биринчидан, Ўзбекистон делегацияси катта таркиб билан мусобақаларга киришди. Иккинчидан, мусобақаларда спортчилар муваффақиятли иштирок этди.

Ўзбекистон делегацияси ушбу Паралимпия баҳсларида 26 та медалга эга чиқди. 10 та олтин, 9 та кумуш ва 7 та бронза медални қўлга киритган паралимпиячилар умумжамоа ҳисобида 13-ўринни қайд этди. Ушбу натижа ҳам улар учун тарихдаги энг яхшиси ҳисобланади. Шунингдек, Осиёда учинчи, МДҲ, Марказий Осиё минтақаси, Ислом бирдамлиги ва Туркий давлатлар ташкилотига аъзо мамлакатлар орасида биринчи ўринни эгаллади.

Бунгача уларнинг энг яхши натижаси Токиода қайд этилган эди. 2021 йили бўлиб ўтган мусобақада 8 та олтин, 5 та кумуш ва 6 та бронза медалини қўлга киритган Ўзбекистон спортчилари якунда 15-ўринга жойлашган эди.

Ўзбекистон делегациясига энг кўп медални енгил атлетикачилар олиб келди. 16 медални қўлга киритган пара енгил атлетикачилар якунда умумжамоа ҳисобида 5-ўринни эгаллади.

Мусобақада Хитой мутлақ устунлик билан биринчи ўринни эгаллади. Улар умумий 220 та ( 94 та олтин, 76 та кумуш ва 50 та бронза) медални қўлга киритди. Буюк Британия спортчилари умумий 124 медал билан иккинчи, 105 медални қўлга киритган АҚШ учинчи ўринни эгаллади.

Совриндорларнинг салмоқли қисми—аёллар!

Ушбу мусобақаларда ўзбекистонлик аёл спортчилар жуда ишончли ҳаракат қилди. Ўзбекистон делегацияси ҳисобидаги 26 медалнинг 12 тасини аёл спортчилар қўлга киритди. Баъзи спортчилар жаҳон рекордини янгилади.

Т11 классида узунликка сакраш баҳсида иштирок этган ўзбекистонлик Асила Мирзаёрова 5,24 метр натижа қайд этиб, ушбу йўналишда Паралимпия ўйинлари рекордини ўрнатди ва Олимпиада чемпионига айланди.

Пара енгил атлетика бўйича аёллар ўртасида Ф54 классида найза улоқтириш дастурида финал баҳсларида Ўзбекистон шарафини ҳимоя қилган Нурхон Қурбонова 21,12 метр натижа қайд этган ҳолда жаҳон рекордини янгилади ва олтин медални қўлга киритди.

Бир мусобақада иккита медал

Ушбу мусобақа Нурхон Қурбонова учун омадли келди. Найза улоқтириш баҳсида олтин медални қўлга киритган ўзбекистонлик спортчи аввалроқ ядро улоқтириш мусобақасида бронза медалига эга чиқди.

Қизиқарлиси, Қурбонова бундан аввал Токио—2020 ёзги Паралимпия ўйинларида кумуш ва бронза медаллар совриндори бўлганди.

Пара енгил атлетика бўйича эркаклар ўртасида Ф37 классида диск улоқтириш дастурида иштирок этган ўзбекистонлик Толиббой Йўлдашев 57.28 метр натижа қайд этган ҳолда делегация ҳисобига олтин медални ёздириб қўйди.

Париждаги ядро улоқтириш баҳсларида ҳам қатнашган спортчи бронза медални қўлга киритди.

Энг ёш иштирокчидан кумуш!

2008 йил 16 октябрда таваллуд топган истеъдодли пара атлет Шаҳина Йигиталиева Ф46 классида найза улоқтириш дастурида қатнашди. У 43.12 метр натижа билан делегация ҳисобига навбатдаги кумуш медални тақдим этди. Ушбу спортчи делегация таркибидаги энг ёш иштирокчи ҳисобланади. Мактаб ёшида қатнашаётган спортчининг эришган натижаси таҳсинга сазовор.

Энг кўп олтин, энг кўп кумуш

Париж Паралимпиадасида Ўзбекистон делегацияси 10 та олтин медални қўлга киритди. Мамлакатнинг энг кўп олтин медални қўлга киритган мусобақалари Рио ва Токио (8 та) Паралимпия ўйинлари ҳисобланади. Кумуш медаллар сонида ҳам Ўзбекистоннинг натижаси яхшиланди. Риодаги мусобақада делегация вакиллари 6 та кумуш медални қўлга киритган.

Уч карра Паралимпия чемпионлиги

Пара енгил атлетикада ядро улоқтириш баҳсларида Ҳусниддин Норбеков 16.82 метр натижа билан Паралимпиада рекордини ўрнатди ва олтин медални қўлга киритди.

Эътиборлиси, делегация байроқдори 3 карра Паралимпия ўйинлари ғолиби бўлган илк ўзбекистонлик спортчига айланди. Норбеков бунгача Рио—2016 ва Токио—2020 да ҳам тенгсиз бўлганди.

Ушбу мусобақада ҳам ўзбек мухлислари Парижни яна лол қолдирди. Ҳар бир мусобақада Ўзбекистон спортчилари ўз уйида баҳсларга кираётгандек муҳит яратилди.

Кеча, 8 сентябрь куни мусобақанинг ёпилиш маросими бўлиб ўтди ва Ўзбекистон тарихидаги энг яхши Паралимпия баҳслари ўз якунига етди.