“Дарё” мухбири Мозори Шарифда ўтказилган афғон аёлларининг кўргазмасида иштирок этиб, у ердаги қатор иштирокчилар, сотувчилар ва давлат идоралари вакилларидан интервью олди.
Балх вилояти Савдо-саноат палатаси раҳбари Асадулла Асадийнинг айтишича, ушбу кўргазма Халқаро меҳнат ташкилоти кўмагида ўтказилган ва уни ўтказишдан мақсад Афғонистонда кичик бизнесни, маҳаллий маҳсулотларни қўллаб-қувватлаш ва маркетингни жорий этишдир.
Ушбу кўргазмада 130 стендда маҳаллий маҳсулотлар ва афғон аёлларининг қўл санъатлари намойиш этилди.
Кўргазмада иштирок этган хотин-қизлар Афғонистоннинг маҳаллий маҳсулотлари билан аҳолини яқиндан таништириш, хотин-қизларнинг иқтисодий фаоллигини кучайтиришда бундай дастурларнинг ўрни катта деб ҳисоблашини маълум қилган.
Кўргазма иштирокчиси Шабнам исмли аёл “Дарё” мухбири билан суҳбатда Ўзбекистон, Тожикистон ва Қозоғистондан Афғонистонга энг сифатли бахмал буюмлар импорт қилинишини айтиб ўтди.
Баъзи саноатчилар шунга ўхшаш товарлар импорти ва саёҳат визаси чекловлари, шунингдек, хом ашё соҳасидаги муаммолар ишдаги асосий муаммолар эканлигини маълум қилган.
Балх вилояти маъмурий ислоҳотлар раҳбарининг “Дарё” мухбирига таъкидлашича, бутун Афғонистонда хавфсизлик таъминланган ва қўшни давлатлар тадбиркорлари Афғонистонга бориб, турли соҳаларга сармоя киритишлари мумкин.
Мозори Шарифга келиб, ушбу кўргазмада иштирок этган татаристонлик тадбиркорлардан бири Илёс “Дарё” мухбири билан суҳбатда Афғонистон ҳақида интернетда ўқиган ва эшитганлари бутунлай бошқача эканини, Афғонистонда хавфсизлик бўйича ҳеч қандай муаммо сезмаётганини, афғонларнинг меҳмондўстлигидан мамнунлигини айтди.
“Толибон” Саноат ва савдо вазирлигининг кўргазмаларини ташкил этиш билан шуғулланувчи ходим Муҳаммад Абид ўз-ўзини таъминлаш учун маҳаллий маҳсулотлардан фойдаланишга урғу бериб, жорий йилда 50 та маҳаллий ва хорижий кўргазмалар ташкил этиш режалаштирилганини айтиб ўтди.
Изоҳ (0)