Туркияда зилзила бўлишини башорат қилган нидерландиялик сейсмолог Франк Хугербиц 2023 йилнинг март ойида “мегазилзила” кузатилишини айтди. SSGEOS илмий институтининг YouTube каналида унинг башорати акс этган видео пайдо бўлди.
Прогнозга кўра, 2 ва 5 март кунлари сайёраларнинг критик геометриясининг яқинлашиши 3-4 март ёки 6-7 март кунлари жуда катта сейсмик фаолликка олиб келиши мумкин. Сейсмологлар силкинишлар сайёранинг 12 нуқтасида кузатилиб, уларнинг магнитудаси 8,5 балл ва ундан юқори бўлишини таъкидламоқда.
“Бўрттираётганим йўқ, қўрқитмоқчи ҳам эмасман. Бу шунчаки огоҳлантириш, чунки сайёра геометрияси катта сейсмик ҳодисаларни келтириб чиқаради”, — таъкидлади Хугербиц.
Қизил зонага кирган ҳудудлар ҳам санаб ўтилган: булар Япониянинг жануби, Индонезия, Португалия, Греция, Покистон ва Шимолий Американинг бир қисми. Курил оролларида ҳам зилзила содир бўлиши прогноз қилинган.
6 февраль куни Туркияда 7,7 ва 7,6 магнитудали иккита зилзила қайд этилди. 23 февраль ҳолатига кўра, табиий офат қурбонлари сони 43,5 минг кишидан ошган. Кейинроқ 20 февраль куни мамлакатда 6,4 ва 5,8 магнитудали янги зилзилалар содир бўлди ва Ҳатай вилоятида вайронагарчиликлар қайд этилди. 27 февраль куни эса Малатя вилоятида яна 5,6 магнитудали зилзила қайд этилди.
Изоҳ (0)