Хитой армияси Тайван ороли яқинидаги сувларда уч кунлик ҳарбий машғулотларни бошлади. Пекин буни “Тайван сепаратистлари учун огоҳлантириш” деб изоҳлади.
“Бу (ҳарбий машғулотлар) Тайван мустақиллиги тарафдори бўлган сепаратист кучлар ва ташқи кучларнинг ўзаро тил бириктириши ҳамда провокациясига қарши жиддий огоҳлантириш бўлиб, миллий суверенитет ва ҳудудий яхлитликни ҳимоя қилиш учун зарурий ҳаракатдир”, — дейилади Хитой ҳарбийларининг қисқа баёнотида.
Тайван Мудофаа вазирлиги вазиятни кузатиб бораётганини, юқори даражадаги ҳушёрликни сақлаб турганини ва орол хавфсизлигини ҳимоя қилиш учун “тегишли” жавоб қайтаришини маълум қилди.
Машғулотлар Тайван раҳбари Сай Инвеннинг АҚШга сафари фонида ўтказилмоқда. Инвен Вакиллар палатаси спикери Кевин Маккарти билан учрашган. Хитой бунга жавобан Тайван раҳбарининг ташрифи юзасидан тадбир ўтказилган Американинг Гудзон институти ва Роналд Рейган кутубхонасига қарши санкциялар киритди.
Тайван 1949 йилда Хитойдан мустақиллигини эълон қилган. Пекин ҳамон оролни ўзининг сепаратист вилояти деб билади. Бироқ Тайпей ХХР таклиф қилган “Бир давлат, икки тизим” моделини рад этиб келади.
Хитой миллий мудофаа стратегиясини акс эттирувчи Оқ китобида қайта бирлашишга қаратилган тинчлик саъй-ҳаракатларида ўсиш бўлмаса, Тайван муаммосини куч билан ҳал қилишни истисно этмаган. Хусусан, ташқи кучлар ва орол давлатнинг мустақиллигини қўллаб-қувватловчиларнинг эҳтимолий аралашуви билан бундай қарор қабул қилиниши мумкин.
Изоҳ (0)