100 минг долларлик от, 50 млн сўмга сотилмаган қўй: Намангандаги халқаро кўргазмадан репортаж (видео)

Наманганда илк бор зотдор ҳайвон ва паррандаларнинг халқаро кўргазмаси бўлиб ўтди. Бу ҳақда “Дарё” мухбири Азизбек Абдувалиев хабар бермоқда.

Кўргазмада Ўзбекистоннинг турли вилоятлари ҳамда яқин хориждан келган фермер ва шахсий хўжалик эгалари 1000 дан ортиқ от, туя, новвос, эчки, қуён, туяқуш, товус, товуқ ва беданалар билан иштирок этди. Улар учун Янги Наманган туманидаги “Ёшлик барака” бозоридан алоҳида жой ажратиб берилди.

“Бу ерга Буцефал лақабли зотли отимизни олиб келдик. Уни Польшада 80 минг долларга харид қилгандик. Ҳозирги нархи 100 минг доллардан кам эмас. Уни аста-секин улоқ чопишга тайёрлаяпмиз, яқин орада биз кутган натижаларни кўрсаца ажаб эмас”, — дейди Тўрақўрғон туманидаги “Денгиз тулпори” фермер хўжалиги вакили Нодирбек Абдурашидов.

Кўргазмада бу каби қимматбаҳо жониворлар кўп эди. Жумладан, Янгиқўрғон туманидан келтирилган 1,5 тоннали Simmental зотли новвос 15 минг долларга баҳоланган бўлса, 200 килограммдан ортиқ вазнга эга Арашан зотли қўй 50 миллион сўмга ҳам сотилмади.

“Тадбирда фермер хўжалигимизда боқилаётган зотли туялар билан иштирок этяпмиз. 80 дан ортиқ туяларимиз бор, уларни асосан турли касалликларга шифо сифатида кўриладиган сути учун парваришлаймиз. Бу сутга талаб жуда юқори, шунча туямиз билан ҳам эҳтиёжни қондиришимиз қийин бўляпти”, — дейди “Обид туячилик” фермер хўжалиги раҳбари Абдурашид Ёқуббоев.

Кўргазмада Тошкент вилоятининг Зангиота туманидан “Болакай” фермер хўжалиги вакиллари ҳам зотли эчкилари билан иштирок этди. Қизиқ томони, 5-6 литр атрофида сут берадиган мазкур зотли эчкилардан бири шу ерда эгизакли бўлди.

“Бугунги тадбир биз учун баракали бўлди. Австриядан олиб келинган 6 та зотли эчки билан қатнашгандик, шу ернинг ўзида уларнинг сони 8 тага етди. Эчкилардан бирини Наманганга совға қилмоқчимиз”, — дейди фермер хўжалиги раҳбари Қудратулла Файзуллаев.

Кўргазма якунида унинг энг фаол иштирокчилари 10 миллион сўмдан 30 миллион сўмгача бўлган пул мукофотлари ва эсдалик совғалари билан тақдирланди. Тадбирга қизиқиш кутилганидан зиёда бўлгани боис ташкилотчилар келгусида унинг давомийлигини узайтиришни режалаштирмоқда.