Эрон Ташқи ишлар вазирлиги матбуот котиби Носир Канани АҚШнинг Исроилга 8,7 миллиард долларлик янги ҳарбий ёрдам пакетини “буюртмачи томонидан жиноятчилар учун мукофот” деб атади.
Унинг сўзларига кўра, Ғазо секторида ҳалок бўлган тинч аҳоли сони ҳисобга олинса, Исроил армиясининг ҳаракатларини ўзини-ўзи мудофаа сифатида баҳолаб бўлмайди.
“Бу суммалар қотиллар ва жиноятчилар учун буюртмачи томонидан берилган мукофотдан бошқа нарса эмас. Дунё Америка Исроил режимининг ҳарбий жиноятларида, жумладан, фаластинликларнинг геноциди ва Ливан халқига қарши ҳозирги жиноятларида биринчи даражали ҳамкор эканлигига шубҳа қилмайди”, деб ёзди Канани Х ижтимоий тармоғида.
26 сентябрь куни Исроил Мудофаа вазирлиги Қўшма Штатлар тез орада давом этаётган ҳарбий амалиётларни қўллаб-қувватлаш учун 8,7 миллиард долларлик ёрдам пакетини юборишини маълум қилди.
Маблағнинг 3,5 миллиард доллари ҳарбий харидлар учун, яна 5,2 миллиард доллар эса ҳаво мудофаа тизимлари учун ажратилган.
Ўша куни АҚШ, Франция ва бошқа иттифоқчилар Исроил-Ливан чегарасида зудлик билан 21 кунлик ўт очишни тўхтатишга чақиргани ҳам эътиборга молик.
Изоҳ (0)