Эронлик рэпер Тумаж Солиҳий (Toomaj Salehi) 2022 йилнинг кузида мамлакатда бўлиб ўтган норозилик намойишларида қатнашгани учун Ислом республикаси суди томонидан олти йил уч ой қамоқ жазосига ҳукм қилинди. Бу ҳақда Al Jazeera телеканали хабар берди.
Ҳукм 10 июль куни чиқарилган. Суд маълумотларига кўра, Солиҳий 22 ёшли Маҳса Аминийнинг ўлимидан сўнг бошланган ҳукуматга қарши намойишларда фаол иштирок этган.
Ўтган йилнинг октябрь ойида ҳибсга олинган 33 ёшли рэпер интернетда кенг тарқалган қўшиқ ва клипларда Эрон ҳукуматини танқид қилган.
Мусиқачи ҳибсга олинганидан сўнг давлат ОАВлари унинг кўзлари боғланган ҳолда ўз сўзлари учун кечирим сўрагани акс этган видеони тарқатди.
Курдистон вилоятидан бўлган Маҳса Аминий 13 сентябрь куни Теҳрон ахлоқ полицияси томонидан ҳижобини нотўғри ўрашда айбланиб ҳибсга олинганидан кўп ўтмай вафот этганди. Гувоҳлар хавфсизлик кучларини қизни калтаклаганликда айблади. Полиция Аминийнинг ўлими бахтсиз ҳодиса эканини айтди.
17 сентябрь куни қизнинг дафн маросимидан сўнг у туғилиб ўсган Сакез шаҳрида норозилик намойишлари бошланиб, кейинчалик Ислом республикасининг барча йирик шаҳарларига тарқалди. Норозиликлар бутун куз давом этди.
Жами 20 мингга яқин эронлик ҳукуматга қарши намойишларда қатнашгани учун ҳибсга олинди. Кейинчалик ёпиқ судларда етти киши ўлимга ҳукм қилинди.
Изоҳ (0)