Исроил расмийлари Ғазо секторининг 2,3 миллион аҳолисини Мисрнинг Синай ярим оролига кўчиришни таклиф қилди. Бу ҳақда The Times оf Israel хабар берди.
Тегишли ташаббус илгари сурилган ҳужжатга 13 октябрь санаси ёзилган. Исроил бош вазири Биньямин Нетаньяхунинг идораси ҳужжатни гипотетик жиҳатдан мумкин бўлган муқобил вариантлардан фақат биттасини кўрсатадиган “концепция қоғози” деб атади.
Унда Ғазо сектори аҳолисини Синай яримороли шимолидаги чодир шаҳарларга кўчириш, у ерда доимий шаҳарлар қуриш ва гуманитар коридор яратиш илгари сурилган. Шу билан бирга, Разведка вазирлиги Исроил ичида фаластинлик қочқинларнинг мамлакатга киришига тўсқинлик қилувчи махсус хавфсизлик зонаси яратишни таклиф қилди.
Ҳужжатда Ғазо сектори аҳолисининг кўчирилгандан кейинги тақдири ҳақида ҳеч қандай маълумот берилмаган. Газета муаллифлари бу сценарийни “Исроил хавфсизлиги учун энг мақбули” деб атаган. Ушбу ҳужжат юзасидан жиддий муҳокамалар бўлмаган.
“Исроилнинг ҳозирда ҲАМАСнинг маъмурий ва ҳарбий салоҳиятини йўқ қилишга қаратилган бирорта расмий платформада эртанги кун масаласи муҳокама қилинмаган”, — дейди мамлакат бош вазири идораси.
Ўз навбатида, Бирлашган Миллатлар Ташкилоти бунга қаршилик кўрсатиб, Исроилнинг Ғазо секторининг 2,3 миллион аҳолисини мажбурий кўчирилишига қарши эканини қайд этди.
“Биз одамларни оммавий мажбурий кўчирилишга аниқ қаршимиз”, — деди БМТ бош котибининг матбуот котиби Стефан Дюжарри.
Изоҳ (0)