Исроил Миллий хавфсизлик кенгаши мамлакат фуқароларини ўнлаб хорижий давлатларга, жумладан, Ўзбекистонга саёҳат қилишда хавф даражаси ошиши ҳақида огоҳлантирди. Бу ҳақда The Times of Israel хабар берди.
“Ғарбий Европа (жумладан, Буюк Британия, Франция ва Германия), Жанубий Американинг кўплаб мамлакатлари (жумладан, Бразилия ва Аргентина), шунингдек, Австралия ва Россия учун саёҳат қилишда таҳдид даражаси 2-даражага кўтарилди, эҳтиёт бўлиш тавсия этилади”, — дейилади тегишли ҳужжатда.
Исроил Африка мамлакатлари, жумладан, Жанубий Африка Республикаси ва Эритрея, шунингдек, Ўзбекистон, Қозоғистон, Қирғизистон ва Туркманистон каби Марказий Осиё мамлакатларига саёҳат қилиш учун учинчи хавф даражасини белгилади. Исроилликларга ушбу мамлакатларга зарур бўлмаган тақдирда саёҳатлар режаларини қайта кўриб чиқиш маслаҳат берилган.
“Исроил Миллий хавфсизлик кенгаши ‘Темир қиличлар’ операцияси бошланганидан бери Исроил хавфсизлик кучлари билан боғлиқ вазиятни доимий равишда баҳолаб келмоқда”, — дейилади баёнотда.
Кенгашнинг қўшимча қилишича, таҳдид даражаси барча мамлакатларни чуқур таҳлил қилиш натижасида тузатилган.
“Уруш бошланганидан бери Эрон ва унинг ҳамкорлари, жумладан, ҲАМАС бутун дунё бўйлаб исроилликлар ва яҳудийларга қарши тобора кўпроқ ҳаракатлар амалга оширмоқда. Бундан ва бутун дунё бўйлаб гижгижлаш, ҳужум қилишга уриниш ва антисемитизм даражаси ошиб бораётганидан келиб чиқиб, Миллий хавфсизлик кенгаши исроилликларга ҳар қандай зарурий бўлмаган саёҳатни қайта кўриб чиқишни яна бир бор тавсия қилади”, — дейилади огоҳлантиришда.
Изоҳ (0)