Исроил ўт очишни тўхтатиш шартини маълум қилди

Исроил бош вазири Биньямин Нетаньяху гаровга олинганларни озод қилмасдан ўт очишни тўхтатиш имкониятини рад этди. Бу ҳақда “РИА Новости” хабар берди.

“Биз тўлиқ куч билан ҳаракат қилишда давом этамиз. Гаровга олинганлар озод қилинмаса, Исроил вақтинчалик ўт очишни тўхтатиш бўйича келишувга рози эмас. Исроил Ғазо секторига ёнилғи етказиб берилишига, молиявий ёрдам кўрсатилишига қарши. Исроил урушда ғалаба қозониш учун қўлидан келганини қилади”, — деди Нетаняху.

Исроил мудофаа вазири ҳам Тель-Авивга ташриф буюрган АҚШ давлат котиби Энтони Блинкенга ҲАМАС томонидан гаровга олинганлар озод этилмаса, ўт очиш тўхтамаслигини айтган. Блинкен эса Исроил Ғазо сектори устидан назоратни қўлга киритиш истаги йўқлигини айтган.

ҲАМАС гаровга олинганларни озод қилишга тайёр, аммо...

ҲАМАСнинг Ғазо секторидаги етакчиси Яҳё Синвар Исроилдан олиб келинган ва гаровга олинганларни озод қилишга тайёрлигини айтган. У ҲАМАС гаровга олинганларни Исроил қамоқхоналаридаги фаластинлик маҳбусларга алмаштиришга тайёрлигини билдирган. Тегишли таклифни ҲАМАСнинг қуролли қаноти ҳам илгари сурган.

“Биз зудлик билан маҳбуслар алмашинуви бўйича битим тузишга тайёрмиз, бунда Исроил қамоқхоналаридаги барча фаластинлик маҳбуслар эвазига ҲАМАС қўл остидаги барча маҳбуслар озод қилинади”, — деган Синвар.

Ҳозирча Исроил мазкур таклифга жавоб бермаган, бироқ гаровга олинганларни ҳар қандай йўл билан қайтаришга тайёрлигини билдирмоқда.