Исроилнинг уч ҳафтадан буён Ғазо секторида олиб бораётган қирғинига жавобан Исроил — Туркия ўртасидаги муносабатлар деярли барбод бўлганига қарамай, Исроил Туркия орқали нефть импорт қилишда давом этмоқда, деб ёзади бне IntelliNews.
Bloomberg хабарига кўра, Малтада рўйхатдан ўтган Seaviolet нефть танкери яқинда Туркиянинг Ўрта Ер денгизидаги нефть маркази — Жайҳан портидан Исроилнинг Эйлат портига 1 миллион баррел Озарбайжон нефтини олиб ўтган. Исроил йиллик нефть истеъмолининг қарийб 40 фоизи Жайҳан орқали ўтадиган нефть ҳисобидан қондирилади.
Туркия президенти Ражаб Тоййиб Эрдўғон дам олиш кунлари Истанбулда бўлиб ўтган “Буюк Фаластин митинги”да Исроилни “ҳарбий жиноятчи” деб атади, 25 октябрь кунги баёнотида эса у ҲАМАС террорчи ташкилот эмаслиги, улар “ўз ерлари ва халқини ҳимоя қилиш учун кураш олиб бораётган озодлик гуруҳи” эканини айтди.
Исроил Қуддус ва Анқара ўртасидаги муносабатларни қайта кўриб чиқиш учун Туркиядан дипломатик ходимларини чақириб олди.
Эрдўғоннинг Исроил томонидан олиб борилаётган қирғинларга қарши кескин баёнотлари ҳамда Ғарб давлатларининг Исроилни қўллаб-қувватлаши фонида Ғарб брендлари, жумладан МcДональдъс ва Starbucks турк истеъмолчиларининг норозилигига дучор бўлмоқда.
Туркиянинг Исроилга нефть жўнатишига рухсат беришда давом этиши сиёсат ва бизнес жиҳатдан ажабланарли эмас, деб таъкидлади нашр.
Нетаняху 2020 йилда Эрдўғон билан халқаро муносабатлар ўйинини тасвирлаб, “Бир пайтлар у (Эрдоғон) мени ҳар уч соатда Гитлер деб атаган бўлса, энди ҳар олти соатда шундай демоқда, лекин шукурки, (Туркия билан) савдо-сотиқ яхшиланди”, деганди.
UNICEF ижрочи директори Кетрин Рассел 30 октябрь куни БМТ Хавфсизлик кенгашида сўзлаган нутқида Исроилнинг ҳужуми оқибатида Ғазода ҳар куни 420 дан ортиқ фаластинлик бола ҳалок бўлаётгани ёки яраланаётганини айтди.
“Бу барчамизни ларзага келтириши керак бўлган рақамлар” — деди у.
Изоҳ (0)