Axios портали манбаларига кўра, Исроил Ғазода қуруқликдаги операцияни бошласа, Эрон урушга аралашиш билан таҳдид қилди. Огоҳлантириш Эрон ташқи ишлар вазири билан учрашув ўтказган БМТ махсус координатори орқали етказилган.
Мурожаатни Эрон ташқи ишлар вазири Ҳусайн Амир-Абдуллоҳиян Байрутдаги йиғилишда БМТнинг Яқин Шарқда тинчлик жараёни бўйича махсус координатори Тор Веннесландга етказди.
Шунингдек, учрашувда “гаровга олинганларни озод қилиш, кескинликни юмшатиш ва можаронинг кенгроқ минтақага тарқалишининг олдини олиш бўйича дипломатик саъй-ҳаракатлар” муҳокама қилинган.
Йиғилишда БМТнинг махсус мувофиқлаштирувчиси Эрон вазиридан можаро кенгайишининг олдини олишга ёрдам беришни сўраган. Абдуллоҳиан бунга жавобан Теҳрон можаронинг минтақавий урушга айланиб кетишини истамаслигини ва ҲАМАС томонидан гаровга олинган тинч аҳолини озод қилишга ёрдам беришга ҳаракат қилишини айтди.
Бироқ, у Эроннинг “қизил чизиқлари” борлигини ва агар Исроил қуруқликдаги операцияни амалга оширса, Теҳрон “жавоб беришга мажбур бўлишини” таъкидлади. Axios портали маълумотларига кўра, Веннесланд бу хабарни Исроил Миллий хавфсизлик кенгаши раҳбари Цахи Анегбига, шунингдек, бошқа юқори мартабали амалдорларга етказган.
Агар Эрон тўғридан тўғри ёки билвосита, масалан, Суриядаги гуруҳлар ёки Ливаннинг Ҳизбуллоҳ ҳаракати орқали урушга аралашса, можаро минтақавий тус олади, дейилади Axios портали хабарида.
Изоҳ (0)