Eron Tashqi ishlar vazirligi matbuot kotibi Nosir Kanani AQSHning Isroilga 8,7 milliard dollarlik yangi harbiy yordam paketini “buyurtmachi tomonidan jinoyatchilar uchun mukofot” deb atadi.
Uning so‘zlariga ko‘ra, G‘azo sektorida halok bo‘lgan tinch aholi soni hisobga olinsa, Isroil armiyasining harakatlarini o‘zini-o‘zi mudofaa sifatida baholab bo‘lmaydi.
“Bu summalar qotillar va jinoyatchilar uchun buyurtmachi tomonidan berilgan mukofotdan boshqa narsa emas. Dunyo Amerika Isroil rejimining harbiy jinoyatlarida, jumladan, falastinliklarning genotsidi va Livan xalqiga qarshi hozirgi jinoyatlarida birinchi darajali hamkor ekanligiga shubha qilmaydi”, deb yozdi Kanani X ijtimoiy tarmog‘ida.
26-sentyabr kuni Isroil Mudofaa vazirligi Qo‘shma Shtatlar tez orada davom etayotgan harbiy amaliyotlarni qo‘llab-quvvatlash uchun 8,7 milliard dollarlik yordam paketini yuborishini ma’lum qildi.
Mablag‘ning 3,5 milliard dollari harbiy xaridlar uchun, yana 5,2 milliard dollar esa havo mudofaa tizimlari uchun ajratilgan.
O‘sha kuni AQSh, Fransiya va boshqa ittifoqchilar Isroil-Livan chegarasida zudlik bilan 21 kunlik o‘t ochishni to‘xtatishga chaqirgani ham e’tiborga molik.
Izoh (0)