Муроджон Аҳмадалиев 20 ноябрь тонгида камарлари ҳимояси учун жанг қилади. «Кака» бу йўлни қандай босиб ўтди?
Ўзбекистон тарихида профессионал боксда иккита чемпионлик камарига эга чиққан илк спортчи Муроджон «Кака» Аҳмадалиев 20 ноябрь тонгида чилилик Хосе Веласкесга қарши рингга кўтарилади. Мазкур жангда ўзбекистонлик боксчи WBA ва IBF камарларини ҳимоя қилади. «Дарё» Муроджон Аҳмадалиевнинг шу кунга қадар босиб ўтган йўлига назар солади.
Муроджон Аҳмадалиев 1994 йилнинг 2 ноябрида Наманган вилояти Чуст туманида таваллуд топган. Болалигиданоқ спортга меҳр қўйган Муроджон 10 ёшидан бокс билан шуғуллана бошлайди. 2007 йилда Тошкентнинг Олимпия захиралари мактабига қабул қилинади.
Ҳаваскор боксдаги фаолияти
Муроджон 2012 йил ёшлар ўртасидаги Жаҳон чемпионатида -49 кг вазн тоифасида иштирок этади ва кумуш медал соҳиби бўлади. 2013 йилда Ўзбекистон чемпиони, Санкт-Петербургда ўтказилган Губернатор Кубоги ғолиби ва ёшлар ўртасидаги Осиё чемпионати иштирокчисига айланади.2014 йилда ҳам мамлакат чемпионлигини қўлга киритади. 2015 йил Доҳада (Қатар) ўтказилган бокс бўйича Жаҳон чемпионатида -56 кг вазн тоифасида финалга қадар етиб боради. Муроджон финалда Майкл Конланга 0:3 ҳисобида имкониятни бой беради ва кумуш медал билан кифояланади. Ўша йилнинг ўзида Бангкокда (Тайланд) бўлиб ўтган Осиё чемпионатида ҳам кумуш медал соҳибига айланади.
2016 йилда Бразилиянинг Рио де Жанейро шаҳрида бўлиб ўтган ёзги Олимпия ўйинларида -56 кг вазн тоифасида иштирок этади. Турнирдаги иштирокини қозоғистонлик Қайрат Ералиевни мағлуб этиш билан бошлаган Аҳмадалиев, чорак финалда аргентиналик Альберто Мелианни 1-раунднинг ўзидаёқ нокаутга учратганди. Финал олдидан у кубалик Робейси Рамиресга қарши жанг қилди. Мазкур жангда ўзбекистонлик чарм қўлқоп устаси очколар бўйича имкониятни бой бериб қўяди ва Рио Олимпиадасини бронза медали билан якунлайди.
2017 йил Тошкентда бўлиб ўтган Осиё чемпионатида олтин медални қўлга киритади. Ўша йилнинг ўзида Германиянинг Гамбург шаҳрида бўлиб ўтган бокс бўйича Жаҳон чемпионатидаги муваффақиятсиз иштирокидан сўнг Муроджон Аҳмадалиев профессионал боксда ўзини синаб кўришга қарор қилади.
Профессионал боксдаги фаолияти
Муроджон 2018 йилнинг 3 март куни Андрей Рябинскийнинг «Мир бокса« промоутерлик компанияси билан шартнома имзолайди. Вадим Корнилов Аҳмадалиенинг менежери, Жоэл Диаз эса мураббийига айланади.2018 йилнинг 10 март санасида Муроджон профессионал боксдаги дебют жангини ўтказади. Иккинчи ярим енгил вазн (-55,34 кг) тоифасида ҳаракат қилган Аҳмадалиев Бруклинда бўлиб ўтган жангнинг биринчи раундида аргентиналик Давид Пазни нокаутга учратади.
Орадан бир ой ўтиб, 21 апрелда Муроджон иккинчи жангини ўтказади. Бруклиндаги Kings Theatre аренаси мезбонлик қилган жангда ўзбекистонлик боксчи аргентиналик Карлос Гастон Суаресга қарши рингга чиқади. Аҳмадалиев жангни муддатидан аввал якунлаб, проф боксдаги иккинчи ғалабасига эришади.
Муроджон 2018 йилнинг ўзида яна 3 та жангда иштирок этади (Луис Молина, Рамон Контрерас, Исак Сарате) ва барчасида ғалаба қозонади.
2019 йилда мексикалик собиқ чемпион, жаҳон чемпионлиги камарига даъвогар Карлос Карлсон устидан ғалаба қозонади. Аҳмадалиев 8 раундга мўлжалланган рейтинг жангида Муроджон тўлиқ устунлик эга бўлади ва 3-раунд тугашига 9 сония қолганида рақибини нокаутга учратишга муваффақ бўлади.
Чемпионлик жанги
Ўзбекистонлик боксчи чемпионлик камари учун жанг қилиш ҳуқуқини қўлга киритади. 2020 йил 31 январда WBA ва IBF камарлари соҳиби Даниэль Романга қарши рингга кўтарилади. Чемпионлик камарлари учун кечган 12 раундлик жанг тўлиқ давом этади. Ҳакамлар қарорига кўра, ўзбекистонлик боксчи ғолиб деб топилади. Иккита ҳакам Аҳмадалиев фойдасига 115:113 ҳисобини қайд этган бўлса, яна бири 113:115 ҳисобида Роман фойдасига қарор чиқарганди.
Шу тариқа Муроджон профессионал боксда саккизинчи жангидаёқ WBA ва IBF йўналишларида чемпионлик камарлари соҳиби бўлди. Бу орқали у профессионал боксда 42 йиллик рекордни такрорлади. Бунгача проф боксда фақат Леон Спинкс 8 та жангдан кейин иккита чемпионлик камарини қўлга киритганди. Леон 1978 йилда ҳакамлар қарорига кўра афсонавий Муҳаммад Алини мағлуб этиб, супер оғир вазн тоифасида WBC ва WBA камарларига эга чиққан эди.
Ундан ташқари Муроджон Ўзбекистон тарихида бир йўла иккита камарга эга чиққан илк боксчига айланди.
Тошкентдаги жанг
Аҳмадалиев 2021 йил 3 апрель санасида Тошкент шаҳридаги Humo Arena майдонида мажбурий даъвогар япониялик Рёсуке Ивасага қарши рингга кўтарилади.
Беллашув Аҳмадалиевнинг фаоллиги билан бошланди. Дастлабки уч раунд тўлиқ Муроджоннинг устунлигида ўтди. Тўртинчи раундга келиб япониялик боксчи вазиятни бироз ўнглашга эришди. Бешинчи раундда Аҳмадалиев зарбалар сериясини ижро этди ва ҳакам жангни муддатидан аввал тўхтатди. Аҳмадалиев мазкур ғалабадан кейин ўз камарларини ҳимоя қилди.
Навбатдаги синов
Муроджон Аҳмадалиев 20 ноябрь тонгида чемпионлик камарини ҳимоя қилиш учун чилилик Хосе Веласкесга қарши жанг қилади. АҚШнинг (Нью-Гемпшир штати) Манчестер шаҳрида бўлиб ўтадиган кечанинг марказий жангида ўрта вазн тоифасидаги Жейсон Куингли WBO чемпиони Деметриус Андрадега қарши рингга кўтарилади.Ушбу жангни ва видеошарҳини бу ерда томоша қилиш мумкин — кўриш.
