«ПСЖ» аёллар жамоасида юзага келган вазият кенг муҳокамага сабаб бўлмоқда. Гап шундаки, жамоа аъзоларидан бири номаълум шахслар томонидан калтакланган. Аввалига буни уюштиришда спортчининг яқин дўсти таркибдаги рақобат сабаб қилган бўлиши мумкинлиги тахмин қилинди. Ҳозирда эса бу ишга «Барселона» собиқ ҳимоячиси Эрик Абидалнинг алоқаси борлиги айтилмоқда. Қуйида икки ҳафтадан бери футбол оммасининг диққат марказида турган воқеа тафсилотлари тақдим этилади.
4 ноябрь куни Париж жамоаси футболчиларидан бирига ҳужум уюштирилди: ниқоб таққан икки эркак ярим ҳимоячи Хейра Ҳамровининг машинасига ҳужум қилган, спортчини ташқарига олиб чиқиб, арматура билан оёқ қисмига зарба берган. Жиноятчилар Ҳамрови билан машинада бирга кетаётган жамоадоши Амината Диаллони эса шунчаки қўрқитиш билан чекланган.
Футболчиларнинг буюмлари ўғирланмаган, гувоҳларнинг айтишича, уларнинг асосий нишони Хейранинг оёқлари бўлган. Ҳамрови шифохонага ётқизилади ва жароҳати сабаб Чемпионлар Лигасидаги «Реал»га қарши учрашувни ўтказиб юборади.
10 ноябрь куни машинада Хейра билан бирга кетган Диалло гумондор сифатида ҳибсга олинди. Қизлар «ПСЖ» сафида бир позицияда ўйнайди — «Реал»га қарши ўйинда Ҳамрови ўрнига айнан Диалло майдонга тушади. Асосий таркибдаги ўрин учун рақобат футболчи қизлар ўртасидаги можаронинг сабаби бўлиши мумкинлиги тахмин қилинди. Ҳамровининг ўзи полициянинг бу версиясидан ҳайратга тушади. Чунки икки аёл доим бирга юрган, қадрдон дўст бўлган.
Диалло ҳибсга олингач, «ПСЖ» воқеа юзасидан расмий баёнот берди: «Амината Диалло ‘ПСЖ’ футболчисига ҳужум уюштиргани учун ҳибсга олинганини клуб тасдиқлайди. Раҳбарият аёллар жамоасининг хавфсизлиги ва саломатлиги учун барча зарур чораларни кўради. ‘ПСЖ’ фактларни аниқлаш учун полиция билан ҳамкорлик қилади. Воқеалар ривожини кузатамиз ва керакли чораларни кўрамиз».
L’Equipe нашри Ҳамрови тергов жараёнида «ҳеч кимнинг асосий таркибдаги ўрнини олиб қўймагани» ва «Париж клубига эндигина келгани кимдадир ҳасад уйғотган бўлиши мумкинлиги» ҳақида гапирган. «ПСЖ»га қадар Хейра бир неча йил «Барселона»да муваффақиятли ўйнаган ва 2021 йилнинг ёзида Париж жамоасига келиб қўшилганди.
Полиция ҳужум Ҳамрови ва у билан дон олишиб юрган эркак сабабли юзага келган, деган версияни ҳам илгари сурган. Ҳамрови ва Диаллонинг гувоҳлик беришича, жиноятчилар уйланган эркак ҳақида нималардир деган.
Шу вақтда яна бир маълумот пайдо бўлди: ўзини Хейранинг собиқ йигити деб таништирган номаълум эркак қизнинг 4 нафар жамоадошига қўнғироқ қилиб, ҳаёти барбод бўлгани ва Ҳамровидан қасос олмоқчи эканини айтган. Бир неча футболчи ҳужумдан икки-уч кун аввал уларнинг машиналари таъқиб қилингани ҳақида хабар берди.
Тахминан бир вақтнинг ўзида ОАВда Эрик Абидал исми пайдо бўлди. Аввалига Абидал ҳам воқеага алоқадор бўлиши мумкинлиги тахмин қилинди. Кейинроқ Le Monde нашри Ҳамровининг телефонидаги SIM карта Абидалнинг номига олинганини аниқлади. Хейра полициячиларга SIM картани собиқ йигити берганини айтган.
«ПСЖ» футболчилари полицияга Ҳамрови Эрик билан ҳужумдан кейин боғланган бўлиши мумкинлиги ҳақида айтган. Уларнинг қайд этишича, қиз Абидалдан рафиқаси бу ишга қанчалик алоқадор экани ҳақида сўраган. Хейра «Барселона»да ўйнаб юрган вақтида (2018–2021 йиллар) Абидал билан танишган бўлиши мумкин. Маълумот учун, Эрик Абидал 2018 йилдан 2020 йилга қадар каталонияликларнинг спорт директори лавозимида фаолият олиб борган.
Абидал ҳам терговга жалб этилишини прокурор тасдиқлади. Франция терма жамоаси собиқ ҳимоячисининг рафиқаси Ҳаёт ҳам сўроққа тутилиши мумкинлиги инкор этилмади.
«Агар прокурор Абидални чақирса, у муаммосиз етиб боради ва барча саволларга жавоб беради. Тўғриси, мижозим бу ишга қандай алоқаси борлигини ҳанузгача тушунганича йўқ», — дейди Эрик Абидалнинг адвокати.
Ҳаёт Абидал аллақачон алоқага чиққан ва барча саволларга жавоб беришга тайёр эканини маълум қилган. Адвокатнинг сўзларига кўра, Абидал хоним бу ишга умуман алоқадор эмас. Эрик ва Ҳаёт 2003 йилда турмуш қурган, жуфтликнинг беш нафар фарзанди бор.
Ҳамрови ҳеч қачон турмуш қурган эркак билан муносабатда бўлмагани ҳақида полицияга маълум қилган. Шунингдек, у ОАВда чиқиш қилиб, тергов вақтида ўзининг шахсий ҳаётига ҳурмат билан муносабатда бўлишларини илтимос қилган.
Изоҳ (0)