Ўзбекистон терма жамоасининг яна бир футболчиси Италияда операция қилинади, Иньестанинг рақамини олган Алвес ва техник мағлубият арафасида турган Бразилия. Энг сўнгги спорт янгиликлари

Дунё ва ўзбек спортига оид 17 ноябрь тонгининг энг муҳим хабарлари дайжести билан танишинг.

Ўзбекистон

Ноябрь ойидаги йиғинда жароҳат олган Ўзбекистон терма жамоаси марказий ҳимоячиси Достон Турсунов Италиянинг Рим шаҳридаги «Villa Stuart» шифохонасида жарроҳлик амалиётини бошдан кечиради.

«Чунсин» клуби футболчиси Грузияга қарши ўйин олди машғулотларида жароҳат олган. Тиббий текширувлардан кейин Турсуновга операция кераклиги маълум бўлганди.

Аввалроқ Фаррух Икромов ҳам айнан ушбу шифохонада муваффақиятли операция қилинган ва харажатлар ЎФА томонидан қопланганди.

Ўзбекистонлик каратэчи илк бор ЖЧ финалида жанг қилади

БААнинг Дубай шаҳрида каратэ бўйича Жаҳон чемпионати баҳслари бўлиб ўтмоқда. Каратэ WKF бўйича -75 кг вазн тоифасида Ўзбекистон шарафини ҳимоя қилган Достонбек Отаболаев финалга йўл олди. У 20 ноябрь куни ҳал қилувчи баҳсда Миср вакилига қарши жанг қилади.

Қайд этиш керак, тарихда илк бор ўзбекистонлик каратэчи Жаҳон чемпионати финалига йўлланма олди.

Сервер Жепаров шогирдлари халқаро мусобақага жўнаб кетди

Ўзбекистон У-15 терма жамоаси 19–23 ноябрь кунлари Тожикистонда ўтказиладиган CAFA U-15 мусобақасида иштирок этади. 17 ноябрь тонгида Жепаров қўл остидаги жамоа Душанбега жўнаб кетди.

Жаҳон

Гуруҳ ғолиблари тўғридан-тўғри йўлланмага эга бўлди. Иккинчи ўрин эгалари ва Миллатлар Лигасида энг яхши натижа қайд этган икки жамоа ўтиш баҳсларида қатнашади.

УЕФА минтақасида тўғридан-тўғри йўлланма олган жамоалар: Хорватия, Германия, Дания, Бельгия, Франция, Испания, Нидерландия, Сербия, Англия ва Швейцария.

Ўтиш ўйинларида қатнашадиганлар: Португалия, Шотландия, Италия, Россия, Швеция, Уэльс, Туркия, Польша, Шимолий Македония, Украина, Австрия, Чехия.

УЕФА ўтиш ўйинлари ҳақида

Иккинчи ўрин олган 10 та жамоа ҳамда Миллатлар Лигасида энг яхши натижа қайд этган Австрия ва Чехия ўтиш баҳсларида қатнашади.

• 1-саватча: Португалия, Шотландия, Италия, Россия, Швеция, Уэльс.
• 2-саватча: Туркия, Польша, Шимолий Македония, Украина, Австрия, Чехия.

Кейн ва Депай — саралаш баҳслари тўпурарлари

УЕФА минтақаси гуруҳ босқичида ортда қолган ўнта турдан кейин Англия ҳужумчиси Ҳарри Кейн ва Нидерландия форварди Мемфис Депай 12 тадан гол билан тўпурарлар рўйхатида биринчи бўлди.

Олтитадан ассист қайд этган Мемфис Депай, Леон Горетцка (Германия) ва Душан Тадич (Сербия) энг кўп голли узатма амалга оширган футболчилар сифатида қайд этилди.

АПЛ раҳбари «Ньюкасл»нинг саудияликларга сотилиши сабаб ўз лавозимини тарк этади

Премьер Лига раҳбари Гари Ҳоффман ўз лавозимини тарк этади. Октябрь ойида АПЛ клублари «Ньюкасл»нинг Саудия Арабистони ҳукуматига тегишли фонд томонидан сотиб олинганига эътироз билдирганди. Ҳоффман ушбу келишувда айбни ўз зиммасига олган.

Яқин вақт ичида Ҳоффманнинг кетиши борасидаги маълумот расман эълон қилиниши кутилмоқда, дея хабар қилмоқда BBC. У 2020 йилнинг апрель ойида лига бошқарувини ўз қўлига олганди.

Дани Алвес «Барселона»да 8-рақамда ҳаракат қилади

Бразилиялик ҳимоячи Каталония клубида 8-рақам остида тўп суради. Клубда ушбу рақамда узоқ вақт давомида Андрес Иньеста ҳаракат қилган.

Қайд этиш керак, бу «Барселона»даги ягона бўш рақам бўлиб, Миралем Пьянич «Бешиктош»га ўтиб кетганидан кейин эгасиз қолганди.

Бразилия терма жамоасига техник мағлубият ёзилиши мумкин

ЖЧ—2022 саралаши доирасида ўтказилмай қолган Бразилия — Аргентина учрашувида катта эҳтимол билан «пентакампионлар»га техник мағлубият ёзилади, дея хабар қилмоқда ТNТ Sports.

5 сентябрь кунги баҳс бошланганидан тўрт дақиқа ўтиб, тўхтаб қолганди. Бразилия соғлиқни назорат қилиш ташкилоти Аргентинанинг тўрт футболчисини (Эмилиано Мартинес, Эмилиано Буэндиа, Джовани Ло Чельсо ва Кристиан Ромеро) мамлакатга киришда карантин қоидаларини бузганликда айблаган ва полиция учрашувни тўхтатиб қўйганди.

Ушбу жамоалар ўртасидаги жавоб учрашуви Тошкент вақти билан 17 ноябрь тонгида ўтказилди ва унда нурсиз дуранг қайд этилди.