«Манчестер Юнайтед»га рад жавобини берган Зидан, оғир вазн чемпионлиги учун жанг қиладиган Канело ва Роналдуни ортда қолдирган Депай. Энг сўнгги спорт янгиликлари

Дунё ва ўзбек спортига оид 18 ноябрь тонгининг энг муҳим хабарлари дайжести билан танишинг.

Ўзбекистон

17 ноябрь куни бўлиб ўтган чорак финал ўйинларидан кейин барча ярим финалчилар номи маълум бўлди. «Насаф» клуби «Андижон»га қарши баҳс олиб борса, «Бунёдкор» ва «Пахтакор» жамоалари ўзаро тўқнаш келади. Ўйинлар 19 ноябрь куни ўтказилади.

Жаҳон

Манчестерликлар раҳбарияти Оле-Гуннар Сульшер истеъфога чиқариладиган бўлса, унинг ўрнига Зинедин Зиданни олиб келиш варианти устида бош қотираётганди. Бироқ франциялик мутахассис ўзини АПЛда ишлашга тайёр деб ҳисобламаяпти ва камида ёзгача дам олмоқчи, дея хабар қилмоқда Bild.

49 ёшли Зидан ёзда «Реал» бошқарувини тарк этганди.

Manchester Evening News хабарига кўра, «Манчестер Юнайтед»нинг асосий мақсади «Лестер» устози Брендан Рожерсни олиб келиш бўлиб турибди. Шунингдек, клуб шорт-листидан Луис Энрике (Испания) ва Эрик тен Хаг («Аякс») каби мутахассислар ҳам жой олган.

Гарет Бэйл жароҳат сабаб 2-3 ҳафтага сафдан чиқди

«Реал» ҳужумкор ярим ҳимоячиси ЖЧ—2022 саралаши доирасида Беларусга қарши кечган баҳсда (5:1) футболчи болдир мушагида муаммо ҳис қилган ва танаффусда захирага олинганди.

Cope хабарига кўра, уэлслик футболчи 2-3 ҳафтага сафдан чиққан.

Бэйл жорий мавсум «Реал» сафида бор-йўғи учта ўйинда иштирок этди. Футболчи жароҳати боис мадридликлар таркибида августдан бери майдонга тушмаяпти.

Расман: Рамон Планес «Барселона»ни тарк этди

Каталон клуби жамоа техник котиби Рамон Планеснинг кетганини эълон қилди. Қайд этилишича, 2022 йилнинг ёзига қадар мўлжалланган шартнома Планеснинг илтимосига кўра бекор қилинган.

Планес 2020 йилнинг август ойида «Барселона»да Эрик Абидалнинг ўрнини эгаллаганди.

Аввалроқ «Барселона» Планес ўрнига Карлес Пуйоль ва Йорди Кройф вариантларини кўриб чиқаётгани хабар қилинганди.

Месси — 2021 йилнинг энг яхши ўйинчиси

Goal нашри ўз обуначилари ўртасида йилнинг энг яхши ўйинчисини аниқлаш учун сўровнома ўтказди. Унда биринчи ўрин «ПСЖ» ҳужумчиси Лионель Мессига насиб этди. Иккинчи поғонадан «Манчестер Юнайтед» вакили Криштиану Роналду ўрин олган бўлса, «Бавария» форварди Роберт Левандовски кучли учликка якун ясаб берди.

1. Лионель Месси
2. Криштиану Роналду
3. Роберт Левандовски
4. Муҳаммад Салоҳ
5. Килиан Мбаппе
6. Эрлинг Ҳоланд
7. Карим Бензема
8. Нголо Канте
9. Кевин де Брюйне
10. Неймар.

«Барселона» форварди 2021 йилда Нидерландия терма жамоаси сафида 17 та гол урди. Бу Европа терма жамоаларида тўп сурадиган футболчилар орасидаги энг яхши натижа бўлди.

Бу борада иккинчи ўриндан Англия вакили Ҳарри Кейн (16 та гол) ўрин олган бўлса, португалиялик Криштиану Роналду (13) улардан кейин поғонадан жой олган.

Канело оғир вазн тоифасида чемпионлик жангини ўтказади

Суперўрта вазн тоифасида мутлақ Жаҳон чемпиони Сауль Альварес (57-1, 39 КО) биринчи оғир вазн тоифасида жанг қилади. Бу ҳақида Бутунжаҳон бокс иттифоқининг (WBC) конгрессида маълум қилинган, дея хабар қилмоқда Boxing Insider.

Унга Илунга Макабу (28-2, 25 КО) рақиб бўлади. Жанг WBC камари учун кечади.

Макабу кетма-кет 9 та жангдан иборат ғалабали серия қайд этмоқда. У 2020 йилнинг январида WBC камарига эга чиққанди. Ўша йилнинг декабрида уни бир марта ҳимоя қилишга ҳам улгурди.

Канело сўнгги жангини ноябрь бошида ўтказиб, Калеб Плантни мағлуб этди ва мутлақ чемпионга айланди.