Афғонистоннинг шимолий минтақаларида вазият ёмонлашмоқда, бу эса Коллектив хавфсизлик шартномаси ташкилотини (КХШТ) жиддий хавотирга солмоқда. Тожикистонга жанубий чегара хавфсизлигини таъминлашда ёрдам бериш зарур, дея айтиб ўтди ташкилот бош котиби Станислав Зас журналистларга.
«Афғонистонда аслида вазият ёмонлашмоқда. Мен буни ҳалокатли деб атамайман, аммо у ердаги вазият жиддий ташвишларни келтириб чиқармоқда», — деди у. «Тожикистонга айнан тожик-афғон чегарасининг хавфсизлигини таъминлашда ёрдам кўрсатиш зарурлиги тўғрисида бизда аниқ тушунча мавжуд».
Заснинг сўзларига кўра, у ушбу чегаранинг турли қисмларида бўлиб, қўшинларнинг жиҳозларига ва одамларнинг кундалик ҳаётига эътибор берган. «Чегара хавфсизлигини таъминлаш учун у ердаги чегарачилар шубҳасиз, ёрдамга муҳтож», — деди бош котиб ва улар КХШТ томонидан қўллаб-қувватланиши ҳақида гапирди.
«Аммо ташкилотга аъзо мамлакатлар аллақачон Тожикистонга икки томонлама ёрдам кўрсатгани — бу жуда яхши ва мамнуният билан қабул қилинади. Айни пайтда биз КХШТнинг тожик-афғон чегарасини мустаҳкамлаш бўйича давлатлараро мақсадли дастурини ишлаб чиқмоқдамиз», — дея қўшимча қилди Зас.
Ташкилот бош котиби «Толибон» билан трансчегаравий отишмалар қайд этилаётгани, натижада тожик томонида қурбонлар бўлганига тўхталди. «Мен шундай отишма чоғида афғонистонликлар ўқидан яраланган бир аёл ўқитувчини бориб кўрдим. Одамлар чиндан ҳам азият чекмоқда», — деди Зас.
Тожикистон чегараси яқинида «Толибон» аъзолари бор-йўқлиги ҳақидаги саволга жавоб берар экан, Зас уларни «интернетда эмас, балки тирик» кўрганини айтди. Унинг сўзларига кўра апрель ойида бош котиб Панж дарёси бўйида дурбин ёрдамида чегара ортидаги Афғонистон шаҳрини кузатган, ўша пайтда шаҳар Афғонистон ҳукумати назорати остида бўлган. Шу билан бирга ҳудудга 300 метр ён томонда аллақачон «Толибон» позициялари ўрнатилган бўлиб, у ерда қора кийимдаги ҳаракат аъзоларини кўриш мумкин бўлган.«Ҳозир, афсуски, биз бўлган жой аллақачон «Толибон» назорати остида», — деди КХШТ бош котиби.
1 июль куни КХШТ Парламент Ассамблеяси Кенгаши Афғонистондаги вазиятдан хавотир билдирган баёнот қабул қилди ва мамлакатдаги барча сиёсий кучларни тинчлик жараёнини илгари суришга чақирди.
Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик-афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди. АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.
Афғонистондан НАТО қўшинларини олиб чиқиш 29 апрелда бошланган, АҚШ ва Толибон ўртасида тузилган келишувга биноан жараён кузда якунланиши керак.
Изоҳ (0)