Afg‘onistonning shimoliy mintaqalarida vaziyat yomonlashmoqda, bu esa Kollektiv xavfsizlik shartnomasi tashkilotini (KXShT) jiddiy xavotirga solmoqda. Tojikistonga janubiy chegara xavfsizligini ta’minlashda yordam berish zarur, deya aytib o‘tdi tashkilot bosh kotibi Stanislav Zas jurnalistlarga.
“Afg‘onistonda aslida vaziyat yomonlashmoqda. Men buni halokatli deb atamayman, ammo u yerdagi vaziyat jiddiy tashvishlarni keltirib chiqarmoqda”, — dedi u. “Tojikistonga aynan tojik-afg‘on chegarasining xavfsizligini ta’minlashda yordam ko‘rsatish zarurligi to‘g‘risida bizda aniq tushuncha mavjud”.
Zasning so‘zlariga ko‘ra, u ushbu chegaraning turli qismlarida bo‘lib, qo‘shinlarning jihozlariga va odamlarning kundalik hayotiga e’tibor bergan. “Chegara xavfsizligini ta’minlash uchun u yerdagi chegarachilar shubhasiz, yordamga muhtoj”, — dedi bosh kotib va ular KXShT tomonidan qo‘llab-quvvatlanishi haqida gapirdi.
“Ammo tashkilotga a’zo mamlakatlar allaqachon Tojikistonga ikki tomonlama yordam ko‘rsatgani — bu juda yaxshi va mamnuniyat bilan qabul qilinadi. Ayni paytda biz KXShTning tojik-afg‘on chegarasini mustahkamlash bo‘yicha davlatlararo maqsadli dasturini ishlab chiqmoqdamiz”, — deya qo‘shimcha qildi Zas.
Tashkilot bosh kotibi “Tolibon” bilan transchegaraviy otishmalar qayd etilayotgani, natijada tojik tomonida qurbonlar bo‘lganiga to‘xtaldi. “Men shunday otishma chog‘ida afg‘onistonliklar o‘qidan yaralangan bir ayol o‘qituvchini borib ko‘rdim. Odamlar chindan ham aziyat chekmoqda”, — dedi Zas.
Tojikiston chegarasi yaqinida “Tolibon” a’zolari bor-yo‘qligi haqidagi savolga javob berar ekan, Zas ularni “internetda emas, balki tirik” ko‘rganini aytdi. Uning so‘zlariga ko‘ra aprel oyida bosh kotib Panj daryosi bo‘yida durbin yordamida chegara ortidagi Afg‘oniston shahrini kuzatgan, o‘sha paytda shahar Afg‘oniston hukumati nazorati ostida bo‘lgan. Shu bilan birga hududga 300 metr yon tomonda allaqachon “Tolibon” pozitsiyalari o‘rnatilgan bo‘lib, u yerda qora kiyimdagi harakat a’zolarini ko‘rish mumkin bo‘lgan.“Hozir, afsuski, biz bo‘lgan joy allaqachon “Tolibon” nazorati ostida”, — dedi KXShT bosh kotibi.
1-iyul kuni KXShT Parlament Assambleyasi Kengashi Afg‘onistondagi vaziyatdan xavotir bildirgan bayonot qabul qildi va mamlakatdagi barcha siyosiy kuchlarni tinchlik jarayonini ilgari surishga chaqirdi.
Avvalroq “Tolibon” Afg‘onistonning Tojikiston bilan chegaradagi hududini egallab olgani hamda tojik-afg‘on chegarasidagi vaziyat keskin deb baholanayotgani haqida xabar berilgandi. Keyinroq Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqargani ma’lum bo‘ldi. AQSh davlat kotibi Entoni Blinken Afg‘onistondan AQSh qo‘shinlari chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmagandi.
Afg‘onistondan NATO qo‘shinlarini olib chiqish 29-aprelda boshlangan, AQSh va Tolibon o‘rtasida tuzilgan kelishuvga binoan jarayon kuzda yakunlanishi kerak.
Izoh (0)