Антарктидада ҳаво ҳарорати бўйича рекорд қайд этилди

Жаҳон метеорология ташкилоти (ЖМТ) Антарктида қитъасида рекорд даражадаги юқори ҳарорат кўрсаткичини тан олди.

Қитъада рекорд даражадаги иссиқлик — Цельсий бўйича 18,3 даража ҳаво ҳарорати 2020 йил 6 февралда қайд этилган, аммо шу пайтга қадар мавжуд маълумотларни текшириш ва таққослаш жараёни давом этаётган эди. Рекорд ҳарорат кўрсаткичи Антарктика яриморолидаги Аргентинанинг Эсперанса тадқиқот станциясида аниқланган.

Антарктида қитъаси учун аввалги тасдиқланган рекорд 17,5 даража эди, ушбу ҳарорат ҳам Эсперансада, 2015 йилда қайд этилган.

«Мазкур максимал ҳаво ҳароратини текшириш жуда муҳим, чунки бу бизга Ернинг чекка қирраларидан биридаги об-ҳаво ва иқлим тасвирини яратишда ёрдам беради. Антарктика яримороли сайёрамизнинг исиш жараёни энг тез кечаётган  минтақаларидан бири бўлиб, сўнгги 50 йил ичида ҳаво ҳарорати деярли 3 даражага ошган», — дея изоҳлади ЖМТ бош котиби профессор Петтери Таалас.

Шунингдек, ЖМТ 2020 йил 9 февраль куни Сеймур оролидаги абадий музликларни кузатувчи Бразилия станциясида 20,75 даражадаги рекорд ҳарорат кўрсаткичи аниқлангани ҳақидаги маълумотларни расман рад этди. Маълумотлар ва мета-маълумотларнинг батафсил таҳлили шуни кўрсатдики, импровизация қилинган радиация ҳимояси ҳарорат датчиклари учун термал хатоликка олиб келган.