Сувайш каналини тўсиб қўйган Ever Given кемасининг эгаси товон тўлайдиган бўлди

Март ойида Сувайш каналини қарийб бир ҳафтага тўсиб қўйган Ever Given контейнер кемасининг эгаси 540 миллион долларлик зарарни қоплаб беради. Бу ҳақда ТNG News хабар берди.

Сувайш канали маъмурияти раҳбари Усама Рабийининг айтишича, канал маъмурияти судга мурожаат қилмасдан барча томонларнинг манфаатларини ҳимоя қилиш мақсадида кема ишини 12 кун давомида кўриб чиққан. Натижада икки томон «принципиал келишув»ни имзолаган, унга, хусусан, томонларнинг ҳар қандай шикоятлардан воз кечиши киради.

Таъкидланишича, келишув Сувайш канали раҳбарияти компанияга нисбатан даъво миқдорини 916 миллион доллардан 540 миллион долларга камайтиргандан сўнг имзоланган.

Шунингдек, келишувда канални қайта жиҳозлаш, шу қаторда янги буксир ускуналарини сотиб олиш ҳам кўзда тутилган. Контейнер кемасининг эгаси Япониянинг Shui Kesen компанияси ҳисобланади.

Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемадан иборат тирбандлик юзага келган. Шунингдек, ҳодиса ортидан нефть нархи кескин ўсган.

Сувайш канали орқали икки йўналишда ҳам кемалар ҳаракати 29 март, душанба оқшомидан қайта тикланди.

Аввалроқ Сувайш каналининг тўсилиб қолиши оқибатида етган зарар 1 миллиард долларга баҳолангани ҳақида хабар берилганди. Канал маъмурияти бўлиб ўтган ҳодисада Ever Given кемаси капитанини айбдор деб атади. Кеманинг эгаси эса ишни судга оширмаслик учун зарарни қоплаб бермоқчилигини маълум қилди.