Япониянинг Сидзуока префектурасида 3 июль куни эрталаб содир бўлган улкан кўчки туфайли тахминан 20 киши бедарак йўқолди. Бу ҳақда Kyodo агентлигига таяниб, «Коммерсантъ» хабар берди.
Хабарга кўра, Японияда бир неча кундан бери кучли ёмғир ёғмоқда, бу эса кўчкилар ва тошқинларни келтириб чиқарди. Префектурадаги Атами шаҳрида маҳаллий вақт билан соат 10:30 (Тошкент вақти билан 07:30) да йирик кўчки содир бўлган. Табиий офат натижасида бир нечта уйлар бузилиб, шаҳар инфратузилмасига зарар етган.
Префектура ҳукумати табиий офатни бартараф этишда ҳамда бедарак кетган одамларни топишда ёрдам сўраб Япониянинг ўзини-ўзи муҳофаза қилиш кучларига мурожаат қилди.
Япония бош вазири ЁсихидэСуга табиий офатлар бўйича ҳаракатларни бошқариш вазири Ясуфуми Танахаси билан учрашув ўтказди. Бундан ташқари, бош вазирнинг қароргоҳида табиий офат оқибатларини бартараф этиш бўйича штаб ташкил этилди. Суга одамларнинг хавфсизлигини таъминлаш учун барча чораларни кўриш зарурлиги тўғрисида гапирди.
Аввалроқ Индонезия ва Шарқий Тимордаги кўчки ва тошқинлар оқибатида 52 киши ҳалок бўлгани, Буюк Британияда ҳам улкан кўчки содир бўлгани, Покистонда йўловчи автобуси кўчки остида қолиб, оқибатда 16 киши ҳалок бўлгани ҳақида хабарлар берилганди.
Изоҳ (0)