Ўзбекистон давлат санъат ва маданият институтининг Фарғона минтақавий филиалининг бир нафар талабасида COVID-19 аниқланди. Бу ҳақда Маданият вазирлиги хабар бермоқда.

Коронавирус касаллиги аниқлангани сабаб ўқув жараёнлари 2021 йилнинг 22 июнидан бошлаб 30 июнга қадар масофавий шаклга ўтказилди.

Ўзбекистонда апрель ва май ойларида ҳам бир қатор олий таълим муассасаларида коронавирус аниқланганди. Жумладан, Тошкент давлат ўзбек тили ва адабиёти университети, Жисмоний тарбия ва спорт университети, Жаҳон тиллари университети, Жаҳон иқтисодиёти ва дипломатия университети, Самарқанд иқтисодиёт ва сервис институти, ЎзЖОКУ, Тошкент давлат шарқшунослик университети, Фарғона давлат университети, Гулистон давлат университети ва Наманган давлат университетларида ҳам COVID-19 га чалиниш ҳолатлари кузатилганди.

Мамлакатда кунлик касалланиш ҳолатлари сони яна ортиб бормоқда. Охирги 4 кун ичида 3 марта кунлик касалланишлар сони 400 тадан ошди. 22 июнда 419 кишида, 21 июнда 395 кишида, 20 июнда 427 кишида ва 19 июнда 415 кишида COVID-19 қайд этилди.

Касалликка чалиниш ҳолатлари кўпайиши ортидан Ўзбекистонда бир қатор чекловлар жорий этилди. Жумладан, жамоат транспортига ниқобсиз чиқиш тақиқланди, санаторий, пансионат ва болалар оромгоҳларига бориш учун ПЗР-тест таҳлили талаб этилмоқда, Афғонистон билан чегара ёпилди. Шунингдек, коронавирусга қарши эмланувчилар гуруҳи кенгайтирилиб, 50 ёш ва ундан катталар ҳамда олий таълим муассасалари профессор-ўқитувчилари бепул вакцина олиши мумкин бўлди.